Nga Boldnews.al
Asnjë drejtues policie nuk ka pasur jetën më të gjatë se ai. Shumë kanë lëvizur, ndërsa për kreun e Policisë Rrugore të Tiranës Erion Ahmetaj, ka një tjetër ligj dhe organikë. Nuk e mban puna e tij, as shifrat e aksidenteve të cilat janë ulëritëse në rritje, apo menaxhimi i qarkullimit rrugor në kryeqytet, e vetmja “meritë” e tij janë lidhjet e forta me drejtuesit e kompanive të ndërtimit dhe jo vetëm…
Disa herë është pezulluar nga detyra, dhe po aq herë është rikthyer si triumfator, duke sfiduar edhe ministrin e Brendshëm që ndonjëherë bën si i rreptë dhe tregon rrallë “spaletat” e dikurshme të gjeneralit, të cilat i ka mbyllur në “kasafortën e Rilindjes”, por kur i duhen i merr “hua” për të treguar forcën.
Është rast unikal në strukturat e policisë ku Ahmetaj është emëruar në detyrën e kreut të qarkullimit Rrugor të Tiranës në maj të vitit 2017 dhe vijon të jetë në këtë funksion pa u shqetësuar. Madje ai ia hodhi lehtë edhe në fundin e marsit të këtij viti ku teksa i gjithë vendi ishte në karantinë, Tirana gëlonte nga qarkullimi i automjeteve, veçanërisht i kamionëve të tonazhit të rëndë dhe mjeteve të tjera të ndërtimit që nën hundën e policisë së rendit të përplasin lejet e siguruara nga Policia Rrugore.
Publikimi i disa videove dhe fotove të Tiranës së mbushur me kamionët e oligarkisë së ndërtimit “detyruan” Ramën që të kërkonte pezullimin e Ahmetajt për pak ditë, sat ë harrohej. Drejtuesit e Policisë së Shtetit e pezulluan, por vetëm për pak kohë. Ai u rikthye edhe më i fortë.
Burime pranë Komisariatit të Policisë Rrugore në Tiranë shprehen për Boldnews.al se në masat administrative (gjoba) nuk ka të ndëshkuar asnjë kompani ndërtimi. Sipas Kodit Rrugor, nëse një automjet i tonazhit të lartë kapet në lëvizje jashtë orarit të përcaktuar, ndëshkohet me masë administrative, deri në bllokim të automjetit. Për aq kohë sa Ahmetaj është në atë detyrë asnjë masë e tillë nuk është marrë, ndonëse faktet flasin vetë kur trafiku i Tiranës në ditë të veçanta bllokohet i gjithi pikërisht nga qarkullimi pa kriter i mjeteve të rënda. Mjetet e oligarkëve që lartësojnë kulla e pallate janë të paprekshme dhe këtë e di çdo efektiv i qarkullimit rrugor në Tiranë.
Ky është një urdhër që ka mbërritur si “sugjerim” deri tek efektivët e thjeshtë të policisë. Ata nuk duhet të ndalojnë asnjë kamion, betoniere dhe mjete të tjera të ndërtimit, pavarësisht se janë në lëvizje në kundërshtim me rregulloren.
Tjetër kut është ai me qytetarët që lëvizin në rrugë. Shumë drejtues mjetesh ndëshkohen me gjoba të majme për parkim të gabuar, vendosje të rripit të sigurimit apo nëse flasin në telefon. Gjobat për rripin e sigurimit shkojnë deri në 150 mijë lekë të vjetra, ndërsa e njëjta masë aplikohet edhe për automjetet të cilët lëvizin pa dokumentacion përkatës. Edhe pse në dukje masat janë “si ndërgjegjësim” për qytetarët, kur vjen çështja për oligarkinë e ndërtimit, Erioni i policisë dhe adashi i tij në krye të bashkisë Tiranë janë njësoj…
