Nga Boldnews.al
Prokuroria Speciale, SPAK, ka refuzuar të zhvillojë hetimet për një kallëzim penal për korrupsion ndaj prokurorit të Tiranës, Kolë Hysenaj, duke ia kaluar çështjen për kompetencë prokurorisë së Durrësit.
Në 9 tetor 2020, një shtetas ka dorëzuar kallëzim penal ndaj Hysenajt në prokurorinë SPAK, nën dyshimet se ka kryer veprat penale të korrupsionit dhe shpërdorimit të detyrës.
Por vetëm pak ditë më pas, në 13 Tetor 2020, drejtuesi i Prokurorisë Speciale SPAK, Arben Kraja, ia përcjell rastin prokurorisë së Durrësit, me shumë mundësi pa kryer asnjë verifikim mbi materialin kallëzues.
“Boldnews.al” ka siguruar shkresën që Kraja i dërgon kolegëve të qytetit bregdetar. Sipas shkresës, “në datë 09.10.2020, shtetasi (X.X) ka paraqitur një kallëzim penal ndaj prokurorit Kolë Hysenaj, për veprën penale të parashikuar nga neni 248 i Kodit Penal” (shpërdorim detyre).
Në vijim, Kraja informon prokurorinë e Durrësit se “vepra penale për të cilën është bërë kallëzimi nuk përfshihet në kompetencën…” e Strukturës së Posaçme Anti-Korrupsion.
Në fakt, Kraja, në shpalljen e moskompetencës, i referohet vetëm veprës penale të “shpërdorimit të detyrës”.
Ndërkohë që kallëzimi ndaj prokurorit Kolë Hysenaj është bërë edhe për veprën penale të “korrupsionit”, e cila është në kompetencën e Prokurorisë Speciale.
Kallëzuesi, në materialin që i ka dorëzuar SPAK-ut, ngre dyshime se prokurori i Tiranës, Kolë Hysenaj, është përfshirë në veprime konkrete korruptive.
Kallëzuesi e mbështet dyshimin e tij në informacionet që ka lidhur me një situatë konkrete.
Pak muaj më parë, prokurori Kolë Hysenaj, gjatë ushtrimit të detyrës së tij, ka marrë nën hetim 5 persona, pjesë e një komisioni shtetëror, i cili ka marrë vendim për një pronë.
Të pestë personat e hetuar ishin në të njëjtat pozita lidhur me aktin administratit-ata e kanë nënshkruar të gjithë.
Por, pas përfundimit të hetimeve, prokurori Hysenaj ka dërguar për gjykim vetëm 3 prej personave, ndërkohë që dy të tjerët i ka përjashtuar nga përgjegjësia penale.
Nisur nga këto rrethana, kallëzuesi ka ngritur dyshimet se prokurori i çështjes, Hysenaj, është përfshirë në korrupsion, me qëllim shmangien nga gjykimi i dy të hetuarve prej tij.
Pasi ka renditur në mënyrë të zgjeruar rrethanat e ngjarjes, kallëzuesi ka kërkuar nga prokuroria SPAK që të zhvillojë hetime ndaj prokurorit Hysenaj për veprën penale të korrupsionit dhe shpërdorimit të detyrës.
Këtë kallëzim, me fakte konkrete, prokuroria speciale SPAK duket se nuk e ka marrë aspak në konsideratë. Drejtuesi i SPAK-ut, vetëm 4 ditë pas dorëzimit të kallëzimit penal, ka vendosur të shmang përgjegjësinë e hetimit, duke e përcjellë materialin pranë Prokurorisë së Durrësit.
Tashmë, do të jetë kjo e fundit që pritet të kryejë hetime ndaj prokurorit Hysenaj. Në rast se nga hetimi konstatohen elementë të korrupsionit, atëherë rasti do t’i përcillet sërish SPAK-ut.
Pra, duket se e gjithë është një lojë “hidh e prit”, ku SPAK-u nuk merr guximin të kryejë hetime për prokurorin e Tiranës, Kolë Hysenaj.
Prokurori Hysenaj rezulton një ndër më të pasurit në sistemin e drejtësisë. Të gjitha pasuritë e tij kanë pasur si burim financiar vetëm pagën e tij si prokuror dhe të ardhurat nga një biznes i vogël bar-kafe të bashkëshortes.
Hysenaj u përball me një numër të madh problematikash dhe dyshime për fshehje pasurie, gjatë seancës dëgjimore të zhvilluar në Komisionin e Pavarur të Kualifikimit, në datën 16 Shtator 2020.
Por, kur pritej vendimi për rezultatet e Vetingut të Kolë Hysenaj, Komisioni i Pavarur i Kualifikimit njoftoi shtyrjen e procedurës për “arsye objektive”, në një datë të papërcaktuar.
