“KRIIK Albania” rreshtohet në radhën e zërave që shprehen se ndryshimet e njëanshme në Kodin Zgjedhor nuk duhet të mos kalojë për herë të dytë në parlament. Në një deklaratë, “KRIIK Albania” bën u bën apel dhe palëve politike të ulen sërish në tryezë për të gjetur gjuhën e përbashkët për këtë çështje.
“KRIIK Albania” shprehet se nevojitet së pari që “Mazhoranca Socialiste të tërhiqet dhe të pezullojë menjëherë shqyrtimin në parlament të dekretit të Presidentit, duke treguar lidership, përgjegjësi dhe largpamësi politike, sikurse ka treguar edhe më parë lidhur me çështje të cilat janë marrë në shqyrtim prej Komisionit të Venecias”.
Nga ana tjetër, në opinionin e KRIIK, aktorët politikë mund dhe duhet t’i japin jetë menjëherë tryezës së dialogut politik për dakordësimin e qëndrimeve konform praktikave dhe standardeve më të mira ndërkombëtare, pa pritur momentin e publikimit zyrtar të Opinionit prej Komisionit të Venecias.
Kujtojmë se ndryshimet e votuara nga mazhoranca dhe një pjesë e opozitës parlamentare u kundërshtuan nga opozita dhe u quajtën shkelje e marrëveshjes së 5 Qershorit. Presidenti Ilir Meta i ktheu për rishqyrtim në Kuvend, ndërsa kërkoi opinionin e Komisionit të Venecias. Ndërkohë, kryeministri Edi Rama, deklaroi se do ta rrezojnë dekretin e Metës, edhe pse përfaqësues të BE-së kanë apeluar që para votimit në Kuvend të pritet opinioni i “Venecias”.
