Vrasja e biznesmenit, lihet në qeli Kliti Leka

Gjykata e Vlorës ka lënë në qeli Kliti Lekën, i akuzuar për vrasjen e biznesmenit Niko Goro, mëngjesin e 17 Tetorit (të shtunën e kaluar).

Gjykata vendosi masën e arrestit me burg, në përputhje me kërkesën e prokurorisë.

Sipas rindërtimit të ngjarjes nga policia, ora shënonte rreth 8:55 kur Goro, kushëri me kryebashkiakun e Himarës, u qëllua me armë zjarri. Nga të shtënat u plagos e motra e biznesmenit.

“Në vendin e quajtur rreth-rrotullimi që të çon në lagjen Spille, nga një person është vrarë me armë zjarri shtetasi Nikollak Goro, 51 vjeç. Si pasojë, është plagosur lehtë në këmbë edhe shtetasja Eftiqi Qesko, 57 vjeçe, jashtë rrezikut për jetën”, njoftoi policia.

Dyshohet se Goro ishte jashtë marketit të së motrës kur autori, pasi doli nga makina, një “Volswagen”, e qëlloi disa herë më armë zjarri. Biznesmeni, pronar i një lokali dhe një hoteli në Himarë si dhe investitior në fushën e ndërtimit, u transportua në spital, por nuk arriti të mbijetojë.

LEXO EDHE  VIDEO/ Shorti për anëtarë të KED, ja emrat e zgjedhur dhe ato zëvendësues

Pas ekzekutimit, autori u largua me makinë. Ai u vu në pranga rreth 1 orë pas krimit. Kliti Leka, 53 vjeç, banues në Tiranë, u arrestua në zonën e quajtur “Livadhet”. Policia njoftoi sekuestrimin e dy armëve zjarri, një kallashnikov e një pistoletë dhe automjetin me të cilin u largua autori pas ekzekutimit.

Leka ka pranuar krimin dhe ka thënë gjatë arrestimit se Goro i kishte marrë token ku ka ndërtuar një hotel dhe nuk i kishte dhënë para apo hyrje, siç kishin rënë dakord paraprakisht.