Në krah të Dendias, Rama thur elozhe për Greqinë: Vend mik, na ndihmuan për tërmetin

Kryeministri Edi Rama, në konferencën e përbashkët për mediat me ministrin e Jashtëm grek, Nikos Dendias, deklaroi se Greqia na u gjend pranë në situatën e vështirë që vendi kaloi nga tërmeti i 26 nëntorit.

Duke vlerësuar ndihmën e Greqisë, Rama theksoi se fqinji jugor ka qenë një nga vendet që u përfshi në dhënien e kontributeve të drejtpërdrejta gjatë konferencës së donatorëve.

“Jemi në një situatë ku kontributi i drejtpërdrejtë jo vetëm me praninë simbolike të ministrit këtu por edhe me praninë e trupave të kërkim shpëtimi nga vendi mik na mundësoi daljen nga ajo situatë duke kursyer jo pak jetë njerëzish.

Sinqerisht asnjëherë nuk do e harroj nxjerrjen nga rrënojat e një djali të ri dhe ata djem me uniformën e një vendi fqinj që vinin për herë të parë këtu sakrifikuan jo pak dhe ishin gati të sakrifikonin jetën e tyre.

Kështu që me atë kujtim të fortë e të paharrueshëm sot e mirpresim këtu mikun tonë për të folur për rrugën e përbashkët të të ardhmes si dy fqinjë që nuk e kemi zgjedhur njëri tjetrin por jemi bashkë nën të njëjtin diell prej mijëra vitesh dhe kemi detyrimin ndaj gjeneratave të bëjmë atë që njerëzit e zakonshëm shqiptarë dhe grekë në marrëdhënien njerëzore.

LEXO EDHE  Zgjatja e pandemisë përkeqëson ekonominë, FMN: Borxhi mund të arrijë në 88%

Ne duhet ti ngremë në të njëjtin nivel pritshmërie ëndrrash të njerëzve tanë”, tha Rama.

Në këtë kuadër, ai tha se me këtë frymë ne kemi hapur një kapitull shumë pozitiv me Greqinë dhe unë dua që ta risjellë këtu dhe faktin se përveç ministrit që ka qenë këtu personalisht në atë moment të vështirë kryeministri Mitsotakis ka qenë i pari që ka dashur të ofrojë ndihmën për ndërtim shpëtimin, dhe i gatshëm në momentin e vështirësisë, në përballjen e pasojave të covidit etj.

“Për ne Greqia ka qenë një partner strategjik dhe mbetet partner strategjik, ne e konsiderojmë Greqinë një fqinj të çmuar dhe patjetër partneriteti ynë është një partneritet për të ardhmen duke mos harruar asnjëherë. Greqia ka qenë një ndër vendet që morën pjesë por edhe u përfshinë në dhënien e kontributeve të drejtpërdrejta gjatë konferencës së donatorëve dhe faktikisht ne sot kemi konfirmuar atë që kemi dakordësuar më parë”, tha Rama