Napoli mposhti me lehtësi Atalantën me rezultatin 4-1, në një sfidë ku zgjidhi gjithçka brenda një 45-minutëshi perfekt.
Sfida u zhbllokua në minutën e 23-të nga Hirving Lozano, që devijoi në rrjetë në pasim të ardhur nga krahu nga Di Lorenzo, ndërsa vetëm 4 minuta më vonë ishte sërish meksikani që dyfishoi shifrat me një gol të bukur nga distanca.
Në minutën e 30 ishte ish sulmuesi i Interit, Matteo Politano, që lëvizi bukur drejt qendrës dhe lëshoi një goditje mjaft të bukur nga distanca, duke shënuar golin e tretë, ndërsa më pas ishte edhe Victor Osimhen që çoi shifrat 4-0 në minutën e 43-të.
Atalanta provoi të ndryshojë diçka në pjesën e dytë, por Napoli menaxhoi mirë avantazhin e thellë dhe uli ritmin e lojës, ndërsa goli i holandezit Lammers shërbeu vetëm për sodisfaksion personal të futbollistit të ardhur këtë verë te zikaltrit.
Vërshëllima finale la në fuqi rezultatin 4-1 në favor të Napolit, që në tre ndeshjet e zhvilluara në fushë ka shënuar plot 12 gola dhe ka pësuar vetëm një, ndërsa Atalanta pëson humbjen e parë dhe dorëzon kreun e renditjes.
