Befasojnë mediat spanjolle: E ardhmja e Donnarumma-s është PSG-ja!

Mediat spanjolle bëjnë me dije se Mino Raiola ka arritur marrëveshjen me Paris Saint Germain për të çuar atje portierin Gigio Donnarumma.

Ky i fundit është një nga pikat më të forta të skuadrës së Milanit dhe një nga portierët më të mirë në qarkullim, ndërsa fakti që ka vetëm 21 vite mbi supe, ka bërë që pas tij të vihen klubet më të mëdha europiane.

Kontrata e Donnarummës me Milanin skadon më 30 qershorin e vitit të ardhshëm dhe prej ditësh palët janë duke negociuar rinovimin, por momentalisht duket se oferta e kuqezinjve është ende larg pretendimeve të Raiolës.

Pikërisht për këtë arsye duket se “super-menaxheri” ka hyrë në negociata me Leonardon dhe kanë gjetur gjuhën e përbashkët për një transferim të portierit 21-vjeçar në “Parc des Princes” verën e ardhshme.

Sipas portalit sportiv spanjoll “Todo Fichajes”, marrëveshja mes palëve është arritur dhe tani pritet vetëm muaji janar për të bërë edhe zyrtarizimin, duke qenë se në 6 muajt e fundit të kontratës, çdo futbollist mund të nënshkruajë me një klub tjetër.

Donarumma gjithmonë ka deklaruar se dëshira e tij është të qëndrojë te Milani, por për këtë ai kërkon një rritje të konsiderueshme të pagës. Tashmë pritet të mësohet nëse kuqezinjtë do t’i plotësojnë kërkesat financiare të lojtarit apo do ta lënë të lirë.