Kreu demokrat Lulzim Basha tha mbrëmjen e sotme në emisionin “Zonë e Lirë” se deri më sot nuk kemi koncensione apo PPP, por janë kontrata shërbimi me shumëfishimin e pagesave.
“Nuk janë as PPP as koncensione janë kontrata shërbimi me shumëfish çmim nga ai që ka tregu. Këto janë hajdutëri e pastër, shumica janë të regjistruara në parajsat fiskale, nuk ka garë dhe janë oferta të pakërkuara”, tha Basha.
Sipas Bashës, kontratat do të anulohen pasi janë me garë fiktive ose nuk kanë asnjë garë, kompanitë janë të regjistruara në parajsa fiskale dhe janë oferta të pakërkuara.
“Nuk do të ketë gara false, apo kompani që regjistrohen në parajsa fiskale dhe më pas shpallen fitues. Çdo koncension ose PPP do të kalojë përmes Parlamentit”, tha Basha.
Kreu demokrat nuk dha shifra se sa nga këto koncensione ose PPP do të anulohen nëse ai do të jetë kryeministër pas zgjedhjeve të 25 prillit, duke sqaruar se nëse do të jepte të dhëna që tani atëherë do të paragjykohej nesër.
I pyetur në lidhje me organet e reja të drejtësisë, Basha tha se ato janë të kapura nga partia në pushtet në pjesën më të madhe.
“Padiskutim organet e reja të drejtësisë janë konstituuar nën presionin e partisë që është në pushtet. Reforma në drejtësi u konceptua për të ndihmuar shqiptarët, por mënyra se si u zbatua ajo ka çuar në kapjen e institucioneve nga pushteti.
Drejtësia kontrollohet nga PS, por nesër pas 25 prillit, nuk do të jetë më nën presion, nuk do të ketë asnjë interes për të mbrojtur një qeveri që e konsideron oponente dhe askush nuk do më akuzojë mua se kontrolloj drejtësinë.
Besoj fuqimisht te ndarja e pushteteve. Rama i kontrollon të gjitha, nga qeveria e parlamenti, te oligarkët dhe krimi”, tha Basha.
Sipas tij, ne kemi konstestuar shumicën e prokurorëve dhe gjyqtarëve të emëruar dhe ne sot presim përgjigjen nga SPAK lidhur me denoncimet që kemi bërë.
