Kryetarja e Kuvendit të Kosovës, Vjosa Osmani, në një intervistë për Çim Peka LIVE, u pyet fillimisht se cilën forcë politike përfaqëson në Kuvend.
“Jam përfaqësuese e qytetarëve të Kosovës, gjithmonë ka qenë kështu. Që nga fëmijëria e kam ndjekur aktivitetin politik të LDK-së. Prej 20 vitesh kam qenë aktive në partinë e LDK-së, për shkak se prindi im ka qenë aktivist. Së fundmi, dyert e LDK-së janë mbyllur për mua nga strukturat aktuale të LDK-së,” tha ajo.
Referuar përjashtimit nga LDK, Osmani tha se një vendim që nuk është marrë në 30 vite.
“Nuk e kam pritur një vendim të tillë pasi është absurditet dhe e kam kontestuar bazën ligjore ku është marrë vendimi.
Kam shfrytëzuar mjetet demokratike për të kundërshtuar këtë vendim. Sipas tyre është marrë me shumicë, por unë nuk i kam parë votat, janë fshirë emrat e atyre që kanë votuar. Nuk më kanë dhënë as të drejtën elementare që të mësoj këtë gjë. Nuk më dhënë as mundësia të shprehem për këtë vendim. Nuk e kam pritur që të shkojnë kaq larg.
Ky vendim është një kërcënim për çdo anëtar të LDK-së që guxon të kundërshtojë vendimet që shkojnë kundër interesit të qytetarëve. Vota ime ka qenë kundërshtim i vazhdimit të kapjes së shtetit,” tha ajo.
