Sipas Institutit Robert Koch (RKI), shifra e infektimeve të reja brenda një dite ishte 5132. Kjo shifër ishte më e lartë se 1000 raste më shumë se një ditë më parë. Hera e fundit kur shifrat qenë kaq të larta sa tani, ishte mesi i prillit.
Sidoqoftë, vlerat nuk mund të krahasohen me njëra-tjetrën, sepse tani kryhen në mënyrë të konsiderueshme më shumë teste – dhe kështu zbulohen më shumë infektime. RKI shkruan për situatën aktuale: “Aktualisht, mund të vërehet një rritje e përshpejtuar e numrit të transmetimeve të virusit në popull në Gjermani.
Prandaj, bëhet thirrje me këmbëngulje që e gjithë popullata të angazhohet për mbrojtjen nga infektimi.”
Të moshuarit më të rrezikuar se më të rinjtë
Përqindja e rasteve me COVID-19 po rritet lehtas në popullatën e moshuar, thuhet më tej. Të moshuarit zakonisht konsiderohen më të rrezikuar ndaj sëmundjeve të rënda të Coronas sesa më të rinjtë.
Numri i pacientëve me Corona në njësinë e reanimacionit është rritur ndjeshëm në ditët e fundit, por vazhdon të jetë relativisht i ulët. Sipas të dhënave të regjistrit të kujdesit intensiv DIVI, të martën u trajtuan në pavionin e reanimacionit rreth 620 pacientë me COVID-19, një javë më parë ishin rreth 450. Në tërësi, megjithatë, ka ende rreth 9000 shtretër të lirë të kujdesit intensiv në Gjermani.
Rreth 281.000 vetë janë shëruar
Sipas RKI, të paktën 334.585 njerëz në Gjermani është dëshmuar se janë infektuar me virusin SARS-CoV-2 që nga fillimi i krizës së Coronas. Numri i vdekjeve të lidhura me infektimin me Corona-n ka qenë pra 9677. Kjo shifër është 43 më e lartë se të martën. Sipas vlerësimeve nga RKI, ka rreth 281.000 të shëruar.
Sipas vlerësimeve të RKI në Gjermani, sipas raportit për gjendjen të martën, numri i riprodhimeve, ose vlera R, ishte 1.18 (të martën: 1.29). Kjo do të thotë se një person i infektuar infekton mesatarisht pak më shumë se një person tjetër. Vlera R përshkruan shkallën e infektimit rreth një javë e gjysmë më parë.
Përveç kësaj, RKI jep një të ashtuquajtur vlerë R shtatë-ditore në raportin aktual për situatën. Vlera lidhet me një periudhë më të gjatë dhe për këtë arsye u nënshtrohet më pak luhatjeve ditore. Sipas vlerësimeve të RKI, të martën kjo vlerë ishte 1.20. Ajo tregon përparimin e infektimeve nga 8 deri në 16 ditë më parë.
Merkeli konsultohet me kryeministrat e landeve
Pasdite, kancelarja Angela Merkel dhe krerët e qeverive të 16 landeve federale do të diskutojnë situatën e tensionuar të pandemisë. Grupi i nivelit të lartë përballet me kritika në rritje të masave të vendosura për Coronan: pakënaqësia për ndalimet e strehimit në hotele po rritet dhe kërkesa për rregulla më të njësuara për Coronan po bëhet më e fortë.
Krerët e qeverive të landeve federale dhe kancelarja do të përpiqen të bien dakord për rregulla më të njësuara gjatë diskutimeve. Pozicionet e landeve federale, për shembull për ndalimin e strehimit në hotele për persona nga lande të tjera të Gjermanisë, kohët e fundit dalloheshin shumë nga njëra-tjetra. Në dallim me raundet e mëparshme të Coronas, këtë herë pjesëmarrësit nuk komunikojnë përmes videove: Merkel i ka ftuar ata në një takim në kancelari.
/Dw.com/
