Ish-ministri i Financave në Qeverinë Nano, Arben Malaj, tha në studion e Syri Tv, se statistikat e Kryeministrit Edi Rama për borxhin janë të pabesueshme.
“Problemi i qeverisë Rama është cënimi i seriozitetit të statistikave publike. Qeveria ka strategji për ta fshehur borxhin. Shifrat e borxhit janë në nivele kritike”, tha Malaj.
Sipas tij, borxhi luhatet afro 100 përqind të GDP-së. “E rëndësishme është që borxhi shkon në nivele shumë shqetësuese”, deklaroi Malaj.
Ai shtoi se mund të ketë një humbje 600 deri në 700 milionë euro nga keqpërdorimi i investimeve publike.
Malaj më pas u ndal edhe te konferenca e kryeministrit Edi Rama, që deklaroi heqjen e akcizës për naftën e fermerëve. Ish-ministri socialist u shpreh se kjo konferencë ishte shumë demagogjike. Sipas tij, mbështetja për bujqësinë është ulur dhe këtë e tregojnë shifrat.
“Bujqësia edhe pse prodhon 20 përqind të GDP, merr 2 përqind të mbështetjes nga buxheti,” tha Malaj.
Sipas tij, Partia Agrare Ambientaliste ka një program për mbështetjen e bujqësisë.
“Edhe kolegët e PD-së mendojnë se bujqësia meriton një mbështetje krejt ndryshe nga ajo që merr aktualisht,” tha Malaj.
