Ambasadorja amerikane, Yuri Kim, u takua sot me kryetaren e Kolegjit të Posaçëm të Apelimit, Albana Shtylla.
Në takim ishte e pranishme edhe Këshilltarja Ligjore Rezidente e OPDAT në Shqipëri, Michelle Lakomy.
Shtylla e njohu ambasadoren Kim me sfidat e procesit të rivlerësimit, nevojën dhe mundësitë për përshpejtimin e tij.
Gjithashtu ajo e informoi në lidhje me përgatitjet e Kolegjit për shqyrtimin e çështjeve të juridiksionit disiplinor për sistemin e drejtësisë, që kjo gjykatë pritet të ketë me fillimin e funksionimit të plotë të institucionit të Inspektorit të Lartë të Drejtësisë dhe mbi vendimmarrjet përkatëse të Këshillit të Lartë Gjyqësor dhe Këshillit të Lartë të Prokurorisë.
Shtylla e konsideroi të domosdoshme për ecurinë e procesit të Vetting-ut, vazhdimin e mbështetjes të partnerëve ndërkombëtarë, si dhe vëmendjen e posaçme të tyre për suksesin e procesit të rivlerësimit.
