Janë mbyllur dy takimet e vlefshme për Grupin 4 të Ligës së Kombeve, Gjermani-Zvicër dhe Ukrainë-Spanjë.
Të besuarit e Joachim Low, barazuan në shtëpi ndaj Zvicrës me rezultatin 3-3 në një sfidë që dhuroi emocione të shumta. Gjermania u gjend në disavantazh dy herë por që arriti të barazonte në të dyja rastet.
Miqtë siguruan avantazhin e dyfishtë brenda 26 minutave të para me anë të Gavranovich (5’) dhe Freuler (26’). “Panzerat” ngushtuan shifrat në minutën e 28-të me “rrjetën” e Timo Werner, ndërsa pjesa e parë do të përfundonte 1-2.
Pjesa e dytë e takimit nisi vrullshëm, teksa në 15 minuta u shënuan 3 gola. Ishte Havertz ai që riktheu baraspeshën në minutën e 55-të, por kundërpërgjigja e Zvicrës erdhi vetëm 2 minuta më vonë, ku Gavranovich shënoi golin e tretë për skuadrën dhe të dytin personal.
Gjithsesi, “panzerat” barazuan sërish rezultatin këtë herë me Serge Gnabry, i asistuar nga Timo Werner.
Rezultati i lojës nuk do të ndryshonte deri në fishkëllimën e fundit të gjyqtarit duke i detyruar skuadrat të kënaqen me 1 pikë.
Nga ana tjetër, Spanja u mposht 0-1 në transfertë ndaj Ukrainës së Shevchenkos. Sfidën e vendosi mesfushori 22-vjeçar Viktor Tsygankov. Talenti u inkuadrua në fushën e lojës në minutën e 65-të, ndërsa vetëm 11 minuta më vonë shënoi golin e fitores për skuadrën e tij.
Pas 4 ndeshjeve të luajtura, Grupi 4 i Ligës A, kryesohet nga Spanja në kuotën e 7 pikëve, e ndjekur nga Gjermania dhe Ukraina me 6 pikë. Zvicra mbyll klasifikimin me 2 pikë.
