Kancelarja gjermane, Angela Merkel, ka paralajmëruar këtë të premte se nëse nuk zbatohen siç duhet masat kufizuese situata nga koronavirusi mund të dalë jashtë kontrollit.
Merkel në një takim me 11 drejtuesit e qyteteve më të mëdha në Gjermani kanë rënë dakord për të zbatuar masa më të rrepta kundër pandemisë, nëse numri i të infektuarve tejkalon një prag prej 50 rastesh për 100,000 banorë, gjatë një jave.
Sipas kancelares kufizimet përfshijnë rregulla më të rrepta për mbajtjen e maskave, kufizime në tubimet private dhe rregulla më të rrepta për blerjen e alkoolit.
Ndër të tjera ajo ka theksuar se përparësia e saj kryesore ishte të shmangte mbylljen e ekonomisë dhe shoqërisë, si në pranverë.
“Ne kemi dëshmuar se mund të qëndrojmë së bashku kundër koronavirusit dhe duhet ta bëjmë atë përsëri”, tha Merkel.
Gjithashtu kancelarja gjermane paralajmëroi se vendi mund të humbasë kontrollin e pandemisë së koronavirusit nëse rajonet me shifra të larta të të infektuarve nuk ashpërsojnë masat.
Ndërkohë ditët e fundit Gjermani ka shënuar rritje të numrit të personave me COVID-19. Gjatë 24 orëve të fundit në Gjermani janë konfirmuar pozitive me Covid 4 516 raste të reja duke e çuar në 314 660 numrin e përgjithshëm të të infektuarve
