Ministrja e Arsimit, Evis Kushi, ka reaguar pas akuzave të ngritura ndaj saj për plagjaturë në marrjen e gradës shkencor “Doktor”.
“Nuk ka mbetur politikan i nivelit të lartë pa u akuzuar për plagjiaturë. Këtë e kemi dëgjuar të gjithë. Akuza ndaj meje, është bërë për një nga artikujt, punime shkencore që më duhet të them se kur e kam dërguar për botim, ka kaluar në të gjitha bordet e revistës dhe është shqyrtuar prej tyre, e më pas është botuar. Kjo është ajo që mund të them për këtë çështje”, tha ministrja Kushi.
Ajo është akuzuar nga studiuesi Vladimir Kola për plagjaturë ose kopjim, pasi ka publikuar një artikull shkencor që në 70 përqind të punimit i përket një tjetë punimi.
Kola publikoi një postim në rrjetet sociale denoncimin dhe tha se nga kontrolli i tij në internet rezulton se 70% e artikullit shkencor me titull ‘Political transition, Corruption and income inequality in new democracies. Special case Albania’, i vitit 2010, me autore Marsida Ashiku dhe Evis Kushi, është kopjuar nga një tjetër artikull shkencor me titull ‘Political Transition, Corruption, and Income Inequality in Third-wave Democracies’, i vitit 2007, me autor Eric Chang.
