Policia e Tiranës, me urdhër të Prokurorisë, ekzekutoi mbrëmjen e djeshme disa urdhër-arreste, që ishin vendosur nga Gjykata e Rrethit Gjyqësor, ndaj 7 personave, dy prej të cilëve janë në kërkim.
Të shpallurit në kërkim janë biznesmeni Naim Kasa dhe Klodian Gradeci, ish-drejtor i hidrokarbureve në AKBN dhe më pas ish-dretor i OST.
Nga burime policore mësohet se Gradeci është larguar nga Shqipëria disa orë para nisjes së operacionit. Më konkretisht, nga verifikimet, mësohet se ai ka udhëtuar rreth orës 05:00 të mëngjesit të djeshëm drejt Turqisë përmes aeroportit Nënë Tereza. Ai ka kaluar në mënyrë të rregullt nga aeroporti, pasi është i regjistruar edhe në sistemin TIMS.
Fakti se ai është larguar ka ngritur dyshimet për një dekonspirim të operacionit, edhe pse masat e sigurisë nga gjykata ishin vendosur në mungesë. Burimet shprehen se SHÇBA pritet të nisë hetimet nëse informacioni ka dalë nga rradhët e policisë apo informacioni ka rrjedhur nga vetë prokuroria.
Gradeci ishte një nga personat që një ditë më parë nuk u gjet në banesë, ashtu sikundër edhe biznesmeni Kasa.
Detaje nga dosja
Referuar informacioneve zyrtare, Prokuroria e Rrethit Gjyqësor Tiranë ka regjistruar procedimin penal Nr.1340 për veprat penale të “Kontrabandës me mallra që paguhet akcizë” dhe “Fshehjes së të ardhurave” të parashikuara nga nenet 172 dhe 180 të Kodit Penal.
Ky procedim është regjistruar mbi bazën e materialeve të dërguara në këtë prokurori nga Drejtoria e Hetimit Tatimor pranë Drejtorisë së Përgjithshme të Tatimeve. Hetimet kanë filluar mbi bazën e kallëzimit penal të drejtorit të përgjithshëm të shoqërisë “Albpetrol”sh.a.
Nga hetimet ka rezultuar se shoqëria “Phoenix Petroleum”sh.a, me drejtues shtetasit Naim Kasa dhe Isuf Berberi, e cila me Marrëveshje Hidrokarbure të miratuar nga Këshilli i Ministrave dhe të ndjekur për ecurinë e saj nga AKBN ka shfrytëzuar disa puse nafte.
Me qëllim plotësimin e detyrimeve për Programin Minimal të Punës apo investimeve të detyrueshme për këto puse nafte) dhe në kushtet kur këto investime nuk i ka kryer, kjo shoqëri ka paraqitur në AKBN tetë fatura të falsifikuara për shërbime që realisht nuk i ka përfituar nga kompania amerikane “Black Swan Energy Service”. Falsiteti i këtyre faturave është konfirmuar nga autoritetet gjyqësore amerikane dhe letra totale e tyre është 1.299.000 USD.
Punonjësit e AKBN të arrestuar (shtetasit Denis Durrsi, Qani Hoxhaj, Rezarta Qose) dhe shtetasi në kërkim Klodian Gradeci, sipas prokurorisë, kanë certifikuar në mënyrë të kundërligjshme punimet e pakryera të pasqyruara në këto fatura si punime të kryera.
Po kështu, punonjësit e administratës tatimore (shtetasit Arben Doda dhe Simon Marku) kanë përpiluar një raport kontrolli në kundërshtim me ligjin duke bërë të mundur kjo administratë të pësojë një dëm ekonomik prej 568.000 USD.
Dëmi që ka pësuar në mënyrë të drejtpërdrejtë AKBN nga veprimet ndërligjshme të punonjësve të saj është 1.472.766 USD.
