Prokuroria e Tiranës urdhëroi dje arrestimin e 5 zyrtarëve të AKBN për të cilën gjykata kishte vendosur masën e sigurisë arrest me burg, ndërsa për një tjetër ishte vendosur masa e sigurisë arrest shtëpie.
Të arrestuarit janë Denis Durrsi, Qani Hoxhaj, Simon Marku, Arben Doda, Naim Kasa (biznesmen) për të cilët është caktuar masa e sigurisë arrest me burg, në mungesë.
Ndërkohë për shtetasen Rezarta Sulejmani, edhe kjo zyrtare e AKBN ishte vendosur masa arrest shtëpie.
Nga burimet mësohet se në kërkim janë shpallur shtetasit Klodian Gradeci, drejtor i hidrokarbureve në AKBN dhe më pas drejtor i OST, dhe Isuf Berberi, biznesmen, një nga kompanitë e të cilit është Fufarma.
Nga të dhënat e raportuara, mësohet se hetimet kanë nisur kur Gradeci mbante funksionin e drejtorit. Hetimet lidhur me çështjen kanë zgjatur rreth 4 vjet dhe dyshimet e prokurorisë, sipas burimeve, janë se dëmi i shkaktuar ndaj shtetit llogaritet në 1 mln dollarë.
Raportohet se Gradeci ka qenë drejtor i OST gjatë kohës që DH Albania përfitoi tenderin 30 mln euro në Burrel.
Gjithashtu Naim Kasa biznesmen, njihet si një nga pronarët e shoqërisë “Stream Oil and Gas ltd” me qendër në ishujt Cayman. Aksionet e kompanisë përfunduan në në pronësi të Naim Kasa në vitin 2016. Kompania e Kasës ka humbur edhe gjyqin në Arbitrazh me qeverinë shqiptare, pas prishjes së kontratës që kishte me Albpetrol.
Të arrestuarit akuzohen për katër vepra penale: Mashtrim me pasoja të rënda, neni 143 i Kodit Penal; Kontrabandë me mallra që paguhen akcizë, neni 172 i Kodit Penal; Fshehje të ardhurash, neni 180 i Kodit Penal; dhe Shpërdorim detyre, neni 248 i Kodit Penal.
Agjencia Kombëtare e Burimeve Natyrore ka si objekt të veprimtarisë së saj zhvillimin, mbikëqyrjen e shfrytëzimit racional të burimeve natyrore, në bazë të politikave qeverisëse dhe monitorimin e postshfrytëzimit të tyre në sektorin minerar, hidrokarbur dhe energjetik.
Fusha e veprimtarisë së AKBN konsiston ndër të tjera edhe në: Propozimin, konsultimin dhe bashkëpunimin me strukturat përkatëse të qeverisë për hartimin e politikave të saj dhe strategjive në fushën e minierave, hidrokarbureve dhe energjisë; Zbatimin e politikave të qeverisë në fushën e minierave, hidrokarbureve dhe energjisë; Sigurimin brenda fushës së veprimtarisë së vet, të oponencës qeveritare për studimet dhe projektet në fushën e veprimtarisë minerare, postminerare, hidrokarbure dhe të energjisë, të paraqitura nga subjektet shtetërorë a privatë, vendase ose të huaja. Për raste të veçanta mund të kërkojë asistencë të specializuar; Promovimin e burimeve minerare, hidrokarbure, hidrike dhe burimeve të rinovueshme të energjisë.
Të arrestuarit
Denis Durrësi, drejtori i auditit
Qani Hoxhaj, drejtor hidrokarburesh
Arben Doda, inspektor tatimesh në drejtorinë rajonale, Tiranë
Naim Kasa, biznesmen në një kompani fantazmë.
Rezarta Sulejmani, specialiste te AKBN
