Aktivistja e Aleancës për Mbrojtjen e Teatrit Kombëtar, Adriana Kalaja, tha në “A Krasta show” se “protesta për shembjen e teatrit kombëtar vazhdon më e fuqishme se kurrë”.
“Kemi depozituar në SPAK 6 kallëzime penale ndaj personave përgjegjës për veprën penale të shembjes së Teatrit Kombëtar.
SPAK duhej të reagonte në kohë për sekuestrimin e truallit dhe projektit të ri të Teatrit Kombëtar.
Tenderi për projektin e teatrit të ri ka mbetur në errësirë. Shumica e tenderave në Bashkinë e Tiranës bëhen pa garë,” tha ajo.
Sipas Kalasë, tani është konfirmuar se ishte një projekt i gatshëm nga kompania Fusha.
Pas raportimeve se edhe në Danimarkë po hetohet për këtë çështje, për shkak se projekti është i danezit Bjarke Ingels, Kalaja tha se “ministria daneze dhe prokurori danez janë duke punuar për të mbledhur gjithë informacionet e nevojshme”.
“20 eurodeputetë kanë marrë përsipër nisjen e një hetimi ndërkombëtar,” theksoi ajo.
