Presdenti Ilir Meta akuzoi Kryeministrin Edi Rama se punon natë e ditë se si t´i ngushtojë hapësirat opozitës.
Meta tha se Rama ka tmerr nga vota e lirë, ndaj edhe dje ndryshkoi Kodin Zgjedhor në mënyrë të njëanshme dhe anti-Kushtetuese.
“Pse i bën Edi Rama këto lëvizje? Sepse 2 në 3 socialistë që i kanë mbetur e urrejnë. Rama çoi Presidentin në Venecia sepse mendonte se do i blinte edhe ata sikundër bën me këta të tjerët”, tha Meta.
Në vijim ai tha se opozita u provokua, ndërsa shtoi se “në 2017 nuk pati marrëveshje po një muhabet kundër zgjedhjeve dhe ndodhi ajo që ndodhi”.
Presidenti tha se do të kthente Kodin Zgjedhor për rishqyrtim në Kuvend, duke respektuar edhe thirrje e PPE-së.
Meta tha se kjo ishte një provë force e një pakice të pakicës me idenë se duke ndryshuar rregullat e lojës do të frikësojnë shqiptarët, tregon se janë në rrugë të gabuar dhe e kanë mbushur kupën.
“Është mirë mos provokojnë më popullin shqiptar, boll kanë vjedhur mandate dhe zgjedhje, boll me teoritë që do vjedhin dhe do blejnë. E kanë një mundësi të përmirësojnë biografinë e tyre dhe të reflektojnë. Përgjegjësitë do të jenë individuale, këtë duhet ta dinë mirë”, tha Meta.
Sipas tij, e vetmja rrugë që mbetet nëse s´ka reflektim, është që shqiptarët të gjithë bashkë të garantojnë me çdo çmim që në 25 prill kjo juntë të largohet nga qeverisja.
“Lidershipi i PS duhet të paktën të jetë në nivelin e përgjegjshmërisë së Ramiz Alisë në vitin 1991”, tha Meta. Sipas tij, edhe shembja e Teatrit Kombëtar kishte si synim që opozita të largohej nga Këshilli Politik dhe unë kam insistuar fortë që opozita nuk duhej të vinte si kusht qeverinë teknike.
