Komisioneri për Zgjerimin, Oliver Varhelyi, u shpreh gjatë një konference për mediat, se do të shikojë nga afër çështjen e debatueshme mbi ndryshimet në Kodin Zgjedhor, që u miratuan nga Parlamenti shqiptar një ditë më parë, ndërkohë që opozita e drejtuar nga PD nuk ka dhënë dakordësinë.
Varhelyi tha se i është raportuar si një çështje madhore dhe në kushte të tilla ai do marrë informacionet direkt gjatë takimeve që do të zhvillojë në Tiranë.
“Mbaj mend që në 5 qershor u arrit një marrëveshje e mirë mes palëve. Përparësia është që opozita të jetë në Parlament dhe që të bihet dakord për Reformën Zgjedhore. Për koalicionet, unë mendoj se për aq kohë sa ligji nuk e pengon krijimin e tyre pas zgjedhjeve, ne mund të gjejmë një zgjidhje të favorshme.
Në rast se parandalohen koalicionet pas zgjedhjeve, them se duhen menduar më mirë gjërat”, tha Varhelyi.
Duke folur për Gjykatën Kushtetuese, ai theksoi se kur të mbahet konferenca e parë ndërqeveritare, duhet që Gjykata Kushtetuese të jetë plotësisht funksionale.
“Është shënuar një progres i jashtëzakonshëm me Reformën elektorale me marrëveshjen e nënshkruar me 5 qershor dhe implementimin e rekomandimeve të OSBE – ODIHR. Po vazhdohet me implementimin e reformës në Drejtësi, po ashtu po vazhdon edhe lufta kundër krimit të organizuar. Janë bërë përpjekje të jashtëzakonshme në vendosjen e rendit dhe sundimit të ligjit”, tha Varhelyi.
