Erion Veliaj, kryebashkiak dhe drejtues politik i PS-së për Tiranën, vijon fushatën në kuadër të zgjedhjeve parlamentare të 25 prillit, por edhe përdorimin e emrave jo pak të njohur të ekranit.
Një ditë më parë, Veliaj paraqiti Valbona Selimllarin, ish-misin e parë shqiptar, aktualisht këshilltare e Kryebashkiakut, si një mbështetje që po i jepej PS.
Sot u shfaq Gazmend Paja, aktor humori, këshilltar i PS në këshillin bashkiak të Tiranës, si mbështetës i Rilindjes. Në të dy rastet, qoftë Selimllari ashtu edhe Paja, janë pjesë e administratës Rilindase dhe kuptohet se dalja në krah të Veliajt apo edhe Ramës, është një detyrim që ata kanë për funksionet që mbajnë.
Paja u shfaq në Farkë, në një takim të Erion Veliajt me socialistët.
“Dikush më pyeti dhe më tha se përse iu bashkove Erion Veliajt dhe shokëve të vet.
Në fakt Jo, këta më janë bashkuar mua. Sepse unë dua një vend më të mirë, siguri më të madhe, dua të kem një vend të qetë ku të rris djalin tim.
Kështu pra, kur vendosa që të kandidoj për Këshillin Bashkiak të Tiranës, mendoj që kam bërë një zgjedhje shumë të mirë, sepse më besoni, nuk ka ndjesi më të bukur se sa të kontribuosh konkretisht për transformimin e qytetit tënd.
Unë jam njeri i punës, e besoj këtë dhe punoj fort.
Ndaj duke besuar këtë e mbështes lali Erin bashkë me shokët e vet. Kam fatin ta njoh edhe nga afër se sa fort punon ai”, tha Paja.
Në fakt lidhjet e Pajës me PS janë shumë më të hershme se ato të Veliajt me këtë parti. Mjafton të kujtojmë Luftar Pajën, aktorin e njohur të humorit, që ka qenë pjesë e Parlamentit në vitet e fundit të diktaturës, 1987-1990.
