Anëtarët e PD-së në Durrës votuan dje mbi kandidatët për deputet, një listë e cila u bë publike, gjatë paradites, ku përfshiheshin 27 emra të përzgjedhur nga Komisioni, i ngritur prej kohësh në Partinë Demokratike për verifikimin e kandidatëve të propozuar nga baza.
Por ajo që ndodhi është paksa e çuditshme, pasi në votim ishin 27 emra, ndërkohë që në përfundim dolën fitues 28, njëri prej të cilëve u shtua siç duket në fund. Emri i shtuar ishte Enri Ceno, i cili nuk ndodhej në listën e publikuar para votimit.
Nuk dihet nëse është një gabim, dhe cila nga listat është e gabuar, ndërsa mungon një reagim zyrtar lidhur me atë se çfarë ka ndodhur në një nga qarqet më të rëndësishme në vend në një proces elektoral.
Në votimin e organizuar dje morën pjesë 2253 anëtarë, nga 3075 që ka dega e PD në Durrës të regjistruar.
Referuar burimeve nga kjo parti, çudia e dytë është se dy nga emrat më potencialë të listës, kanë marrë edhe numrin më të lartë të votave kontestuese.
Burimet shprehen se bëhet fjalë për dy ish-deputetët Igli Cara dhe Oerd Bylykbashi. I pari, një prej mbështetësve të ish-deputetit të ndjerë, Sokol Olldashi, në garën e zhvilluar në 2013 në PD për postin e Kryetarit, pas dorëheqjes së Sali Berishës. Ndërsa Bylykbashi është një nga figurat qendrore të PD-së së drejtuar nga Lulzim Basha.
Të dy ish-deputetët raportohet se kanë marrë vota kontestuese në kufijtë e 20 %, por bazuar llogaritjeve nuk skualifikohen nga gara e mëtejshme.
Nuk dihet nëse ky ka qenë një gabim, pra anëtarët kanë menduar se votat që u japin kandidatëve nuk janë kontestuese, apo realisht ka qenë një votë kontestuese për ta.
Deri më tani demokratët kanë zhvilluar zgjedhjet në qarqet e Kukësit, Dibrës, Shkodrës, Beratit, Gjirokastrës, Lezhës dhe Durrësit, ndërsa sot procesi zhvillohet në Vlorë.
Kukësi dhe Berati prodhuan surpriza, pasi anëtarësia përjashtoi nga gara dy ish-Kryebashkiakë dhe një ish-deputet.
