Qeveria bën një hap pas dhe tërhiqet nga ligji për përgjimin e qytetarëve. Në projektligjin e qeverisë parashikohej që çdo person mund të përgjohej nga policia, pa lejen e prokurorisë.
Por ministri i Brendshëm Sandër Lleshaj, tha sot në Komisionin e Sigurisë se nuk do të ketë përgjime, por vetëm vëzhgime.
“Kemi bërë një ndryshim për ligjin. Do të ketë vetëm vëzhgim dhe monitorim. Nuk do të ketë përgjime pa lejen e prokurorisë. Policia do monitorojë në terren situatën, por prokuroria vendos për përgjimet.
Është zëvendësuar fjala përgjim ambiental me mbikqyrje. Dhe kjo besoj që e ka zhvlerësuar dhe adresuar në thelb shqetësimin e disa kolegëve, dhe përfaqësues institucionesh.
Në thelb ligji 131, gjatë veprimtarisë informativo- gjurmuese, me qëllim parandalimin e veprave penale, zbulimin e tyre, autorëve. Policia merr, përpunon. dokumenton informacion nëpërmjet
a)Mbikqyrjes së veçantë zanore të komunikimeve joelektronike.
b) mbikëqyrjes së veçantë për personat e dyshuar në vendet publike
c) Gjurmimin e personave të dyshuar me mjete dhe teknika të veçanta për të lokalizuar vendndodhjen”, – tha Lleshaj.
Çfarë parashikonte ligji?
Gjatë veprimtarisë informative-gjurmuese ose të një procedimi policor, me qëllim parandalimin dhe zbulimin e veprave penale të autorëve të tyre, Policia e Shtetit përdor këto masa të veçanta:
Përgjimin ambiental të bisedave të personave në ambiente publike, si dhe në mjete të transportit publik;
Përdorimin e pajisjeve teknike për fotografimin, filmimin ose me video të personave në vende publike dhe përdorimin e pajisjeve gjurmuese të vendndodhjes;
Përgjimin e bisedave telefonike ose telekomunikimeve, që rregullohet me ligj të veçantë;
Mbikëqyrjen e fshehtë të personave të dyshuar për kryerjen e veprimtarive kriminale.
Përdorimi i masave të veçanta, të parashikuara në shkronjat “a”, “b” dhe “ç”, të pikës 1, të këtij neni, bëhet me vendim të miratuar nga titullarët e strukturave të policisë, në nivel drejtorie qendrore e vendore.
