Presidenti Ilir Meta ka dalë në konferencën e përjavshme për mediat. Meta denoncoi faktin se shumë investitorë të huaj po çojnë Shqipërinë në Gjykatën e Arbitrazhit, duke i shkaktuar dëm të madh buxhetit të shtetit.
Presidenti akuzoi Avokaturën e Shtetit se ka shkelur Kushtetutën, duke mos i kthyer përgjigje Presidentit të Republikës.
“Shumë investitorë e kanë çuar Shqipërinë në Arbitrazh, për shkak të veprimeve arbitrare të zyrtarëve në Shqipërisë. Janë përdorur edhe deklaratat e kryeministrit në këto gjyqe dhe dëmi ekonomik është shumë i madh.
Vendimet e Gjykatës së Arbitrazhit, janë rrezik për financat e vendit. Ekonomia në Shqipëri në situatë kritike dhe parashikimet e organizatave të huaja tregojnë keqmenaxhimin. Shteti shqiptar nuk mund të marrë borxhe pa fund. Korrupsioni dhe veprimet e paligjshme të kryeministrit dhe vartësve të tij, po shkatërrojnë financat e vendit.
Avokatura e Shtetit, institucion në varësi të kryeministrit, guxon dhe nuk i kthen përgjigje Presidentit të Republikës, është një shkelje kushtetuese”, – u shpreh Meta.
