Kreu demokrat, Lulzim Basha, tha se nëse Edi Rama nuk i zbaton 5 pikat e propozuara nga PD atëherë në 6 muajt që kanë mbetur vendi mund të shkojë në gropë.
“Situata do të përkeqësohet. Rama duhet të zbatojë propozimet tona. Çështja është që e keqja të mos shkojë deri në fund”, tha Basha.
Ai u shpreh se dosjet e Edi Ramës janë gati dhe ai do të shkojë për ndjekje penale.
“Edi Rama do të përballet me drejtësinë, pas 25 prillit e pret drejtësia. Ato dosjet që janë bërë gati do të hetohen nga drejtësia. Unë për Edi Ramën nuk kam asnjë ofertë, e keqja do të largohet me votë për të sjellë ndryshimin. Nuk ka qeveri me Edi Ramën. Nuk ka bashkëqeverisje me Edi Ramën, ai do të dërgohet para drejtësisë dhe do të jetë kjo e fundit që do të vendosë për grabitjet dhe vjedhjet galopante”, tha Basha.
Ai tha se Rama do të largohet me votë dhe është i pashpresë.
“Ka dy mandate që vjedh e grabit. Po bën lemerira duke tentuar të ndalojë koalicionet. Ai e di edhe nga sondazhet që është i pashpresë.
Një nga masat e para që do i propozoj Parlamentit është kufizimi i mandateve të Kryeministrit në vetëm dy mandate”, tha Basha.
