Një rast përdhunimi është shënuar së fundmi në Indi, ku një grup të rinjsh prej katër meshkujsh kanë përdhunuar një 19 vjecare, në Hathras ( India veriore).
Ajo mori dëmtime të rënda dhe pas dy javësh vdiq në një spital në Dehli.
Pas vdekjes, forcat policore dhe ato spitalore dogjën trupin e saj pa pëlqimin e familjes.
Aktivistët thonë se policia duhet të shpjegojë pse e mori këtë vendimin çnjerëzor.
Agresorët janë arrestuar dhe hetimet kanë filluar menjëherë.
Gazetarja vendase Abhishek Mathur, e cila ishte dëshmitare e djegies së trupit, i tha BBC se policia i mbajti familjen dhe median e saj larg kullës së krematoriumit.
Trupi i saj u soll në vendlindje rreth mesnatës. Vëllai i viktimës tha se zyrtarët e policisë ushtruan presion mbi familjen për ta djegur trupin e vajzës menjëherë.
“Kur ne refuzuam, ata morën trupin në një ambulancë dhe e dogjën atë,” tha ai.
Një zyrtar i lartë i administratës së rrethit, e mohoi këtë pretendim, duke thënë se pasi familjes i ishte mohuar kërkesa për të marrë trupin në shtëpi, trupi ishte djegur po me pëlqimin e këtyre të fundit.
“Forcat policore kishin formuar një zinxhir për të ndaluar turmat protestuese, familjen dhe mediat të mos afroheshin në vendin e djegies,” shtoi ai.
Vëllai i viktimës tha se disa oficerë policie ishin të ashpër me ta.
“Ata e morën trupin e motrës time pa lejen tonë dhe e dogjën atë. Ne as nuk e pamë për herë të fundit,” tha ai.
Ai më tej shtoi se policia rrahu anëtarët e familjes kur ata protestuan për të parë trupin.
Zyrtarët e policisë nuk kanë bërë një deklaratë në lidhje me akuzat.
Vdekja e saj ka shkaktuar protesta në të gjithë vendin. Ata janë të zemëruar me mënyrën se si policia e trajtoi hetimin.
Vëllai i viktimës tha se asnjë arrestim nuk ishte bërë në 10 ditët e para pasi ndodhi ngjarja. “Ajo u la të vdiste. Ajo luftoi për jetën për 14 ditë,” tha ai.
Disa udhëheqës të opozitës e kanë quajtur incidentin fyes dhe të padrejtë.
Dalitët, një komunitet vendas, janë disa nga qytetarët më të nëpërkëmbur të Indisë. Pavarësisht ligjeve që i mbrojnë ata, diskriminimi mbetet një realitet i përditshëm për popullsinë Dalite, që mendohet të jetë rreth 200 milion.
Përdhunimi dhe dhuna seksuale kanë qenë në qendër të vëmendjes në Indi që nga sulmi i vitit 2012 në Delhi, i cili çoi në protesta të mëdha dhe ndryshime në ligjet e përdhunimit të vendit./BBC/
