Debati për turizmin/Gazetari Tomorri kundërshton Klosin: Këtë vit tri herë më pak turistë se në 2019

Ministri i Turizmit, Blendi Klosi, i ftuar në Çim Peka LIVE, komentoi situatën e turizmit gjatë këtij viti. Fillimisht ai komentoi edhe deklaratën e tij se do e zgjasin sezonin turistik deri në nëntor.

“Nuk është mbyllur sezoni turistik, Shqipëria ka mundësi të ketë 12 muaj turizëm,” tha ai.

“Që në datën 1 qershor, ne ishim të parët dhe të vetmit në rajon ne hapëm kufijtë dhe për asnjë moment nuk ceduam përsa i përket kufirit. Nuk bëmë si vendet e tjera fqinje. Nga 1 qershori kemi turizëm të qëndrueshëm. Shqipëria ia doli falë disa marrëveshjeve që bëmë me disa operatorë turistikë,” tha ai, duke cituar marrëveshjet me Bjellorusinë dhe Poloninë.

LEXO EDHE  VIDEO/ Shqiptarët vdesin dyerve të spitaleve, Rama publikon 3D

Megjithatë, Klosi tha se shumica e turistëve ishin nga vendet e rajonit, Kosova, Serbia, Bosnja, Maqedonia.

“Objektet mikpritëse kanë bërë biznes afërsisht sa 2019-a, disa edhe më mirë,” tha ai.

Por kjo deklaratë u prit me skepticizëm.

Gazetari Klodian Tomorri tha se kanë hyrë në vend gati tre herë më pak turistë se vjet.

“Në gusht ishin 62 përqind më pak se vjet dhe në 8-mujor janë 64 përqind. 1.7 milionë turistë ishin këtë vit, 4.8 milionë ishin vjet,” tha ai.