“Me ty u linda, me ty u rrita”, Muça emocionon tifozët bardheblu

Gentian Muça ka zgjedhur largimin nga Tirana, ndërsa i ka befasuar të gjithë me vendimin e tij. Mbrojtësi, i cili dha një kontribut të rëndësishëm në fitimin e titullit kampion sezonin e shkuar, do të provojë një eksperiencë të re në Kosovë me Prishtinën.

“Me ty u linda, me ty u rrita…”, shkruan Muça në postimin e tij, frymëzuar nga një këngë që tifozët bardheblu dhe ai e kanë kënduar shpesh së bashku.

“Dhe jo vetëm, por me ty e ndava gëzimin dhe hidhërimin”, shton ish-kapiteni i Tiranës që nuk ndalet me kaq.

LEXO EDHE  Kalendari i Kategorisë së Parë, zbuloni përballjet e javës hapëse

“Ty të kushtova rininë dhe karrierën time dhe si këmbim mora mbrapsht diçka që nuk blihet me para. Mora më të bukurën prej teje, mirënjohjen, dashurinë dhe duartrokitjet e të gjithë tifozerisë bardh e blu.

Ndaj për respekt të të gjithë dashamirësve bardh e blu, ndjej detyrim të sqaroj se largimi im nga KF Tirana erdhi për arsye profesionale. Kam akoma mundësi për të kontribuar në fushën e blertë. Faleminderit për gjithçka. Gent Muça, njoni prej jush! Gjithmonë bardh e blu”, shkruan Muça.