Oerd Bylykbashi, ish-deputet i PD-së, i është drejtuar me një thirrje qytetarëve të Durrësit, për t´i kthyer Edi Ramës më 25 prill kusurin e babëzisë së tij.
“Durrsakët kanë shansin që më 25 prill 2021, t’i kthejnë kusurin Edi Ramës dhe bandës të tij për atë ku PS e katandisi qytetin në 20 vite qeverisje.
Nje masakër urbane! E grabitën pushtetin me vota të manipuluara më 1 tetor 2000 dhe vazhdojnë ta vjedhin pa u ndalur në grykesine e tyre. Dhe në 15 vitet e fundit Rama është ai që ka caktuar me dorën e vet Dakon dhe bandën rreth tij që masakruan Durrësin”, shkruan Bylykbashi.
Në vijim ai thekson se Durrësi i duhet hequr nga dhëmbët këtyre hienave dhe i duhet kthyer sa më parë banorëve të tij.
“Sot me 15 minuta shi, të gjithë morën sërish provën e babëzisë së kësaj qeverisje grabitqare. Sa herë do të ishin bërë kanalizimet, do ishin hequr plehrat që digjen, apo do të ishin bërë parqe e punë publike që jeta e durrsakëve të ishte më e mirë, nëse 20 buxhetet vjetore do ishin për durrsakët e jo për Dakot e Ramës?”, shkruan Bylykbashi.
