Sizmiologu Dushi: Aplikacionet e tërmetit nuk janë të saktë, mos i merrni gjithmonë parasysh

Sizmiologu shqiptar Edmond Dushi, në një intervistë për televizionin Faxnews, është shprehur për situatën sizmiologjike në vend një vit pas tërmetit të parë të 21 shtatorit. Dushi u ndal tek aplikacionet dhe mënyra si ato e marrin informacionin nga institucione sizmiologjike si IGJEUM apo dhe institucione të tjera rajonale dhe më pas e transmetojnë tek qytetarët. Sipas sizmiologiut këto aplikacione fillimisht hedhin vlerësimin paraprak të tërmetit që u serviret nga institucionet kombëtare ose rajonale që merren me këtë fushë.

Ky informacion mund të mos jetë i saktë pasi magnitude ose thellësia e tërmetit mund të ndryshojë. Ndaj njerëzit duhet të presin vlerësimet përfundimtare ose të marrin informacion nga faqe si IGJEUM. Gjithashtu Dushi u shpreh se Shqipëria bën pjesë në një brez mjaft aktiv sizmiologjik, me mikrotërmete dhe tërmete të vegjël.

“Aplikacionet japin një informacion por nuk bëjnë një vlerësim të aktivitetit sizmik. Ato furnizohen me informacion nga organizata të ndryshme sizmiologjike, siç është EMSC organizata mesdhetare e sizmiologjisë. Nuk duhet të harrojmë se si funksionon një mënyrë e tillë e rjedhjes së informacionit. Realisht janë institucione si IGJEUM, apo institucione të tjera në rajon që monitorojnë të gjitha tërmet në dy mënyra kryesore. Mënyra e parë është mënyra më e shpejtë e cila ka dhe pasaktësinë brenda, dhe mënyra e dytë është mënyra manual ose vlerësimi nëpërmjet përpunimit të të dhënave dhe është një informacion më i sakt. Vlerësimi paraprak bëhet me qëllim të bëhet një sinjalizim i instancave përkatëse ose dhe nga vetë njerëzit të njoftohen për ngjarjen që ka ndodhur. Por ky informacion paraprak mund të mos jetë i saktë dhe mund të azhornohet nga një vlerësim i dytë.

Ky informacion raportohet në organizata si EMSC e cila më pas e shfaq në aplikacion. Njerëzit duhet të marrrin parasysh vlerësimin e fundit që i bëhet tërmetit. Ndaj këto aplikacione në disa raste janë të pasakta pasi japin vlerësimin paraprak, ndaj njerëzit duhet të shohin vlerësimin përfundimtar, madje të ndjekin dhe faqe si IGJEUM.

Shqipëria bën pjesë në një nga brezat më aktiv sizmiologjik, ndër më aktivët në rang botëror. Në territorin e Shqipërisë vërhen fatmirësisht mikrotërmete dhe tërmete të vegjël”, thotë Edmond Dushi.