Rasti i radhës i transmetuar në emisionin “Stop”, këtë të premte, më 22 maj ka ndodhur në zonën e Kombinatit në Tiranë, ku është evidentuar një situatë problematike mes ambulantëve të paligjshëm dhe tregtarëve të formalizuar, që sipas këtyre të fundit po u dëmton biznesin.
Tregu i Kombinatit, një nga shtatë tregjet fikse, që administrohet nga Agjencia e Administrimit të Tregjeve, Bashkia Tiranë, ka mungesë klientësh, sidomos në sektorin e rrobave të përdorura.
Tregtarët shprehen se, ndonëse paguajnë taksa mujore, xhiroja e tyre është ulur ndjeshëm. Sipas tyre, një treg informal është zhvilluar shumë pranë tyre, ku shiten rroba të përdorura dhe produkte të tjera pa asnjë detyrim tatimor.
“S’kemi punë fare. Edhe pagesat që i paguajmë duhet me i marr borxh. Sot s’kam pasur asnjë klient, për kokën e fëmijëve asnjë. As pardje, as dje, as sot. Në dhjetë ditë as një mijë lekë se bëj, betohem në Zot”, pohoi një denoncuese.
Ata denoncuan se tregtia zhvillohet në një ambient të improvizuar, përfshirë katin e parë të një pallati të dëmtuar nga tërmeti, që paraqet rrezik për sigurinë e njerëzve. Tregtarët e licencuar shprehen, se kjo konkurrencë e pandershme, i ka çuar drejt falimentimit.
“Është bllokuar tregu nga ambulantët e paligjshëm jashtë. Edhe ata duan të punojnë, duan të ushqehen kanë fëmijë, por Bashkia t’jua mundësojë punën atyre në një treg tjetër, jo treg përpara tregut”, u shpreh një tjetër denoncuese.
Gjatë vëzhgimit në terren u evidentua gjithashtu mungesë reagimi nga strukturat e kontrollit, ndërsa prezenca e Policia Bashkiake Tiranë u përshkrua nga tregtarët si pasive.
Drejtori i Agjencisë së Tregjeve, Fatjon Dhuli pranoi ekzistencën e problematikës, duke deklaruar, se institucioni ka kërkuar disa herë ndërhyrjen e Policisë Bashkiake.
Ai u bëri thirrje tregtarëve ambulantë të formalizohen dhe të bëhen pjesë e tregjeve të miratuara.
Biseda e “Stop” me tregtarët e paligjshëm:
Tregtarja 1: Shesim kështu, nuk paguajmë taksa.
Tregtarja 2: Rri pa frikë! Ne rrimë gjithë ditën këtu. (te pallati i dëmtuar)
“Stop”: Po këta të bashkisë, nuk ju thonë gjë?
Shitësja: Po ça do thonë?
/tvklan.al
