Kryebashkiaku i Tiranës, Erion Veliaj, ka pohuar sot se rrugët e kryeqytetit nuk janë ngushtuar, ndërsa i ka cilësuar si legjenda urbane atë që në fakt ka ndodhur.
Mjafton të shikosh rrugën e Durrësit, e cila ka pasur 4 korsi, dy në secilin drejtim, për të rrëzuar gënjeshtrën e rradhës së Veliajt.
Aksi rrugor iu nënshtrua rikonstruksionit, dhe sot ai ka vetëm dy korsi, me një sens lëvizjeje. Punimet e kryera kanë zgjeruar korsinë e biçikletave, kanë ngjeshur trafikun e automjeteve, gjë që pohohet çdo ditë nga drejtuesit e tyre.
Se ndërtohen korsi biçikletash apo ka zgjerime trotuaresh nuk ka asgjë të keqe, por çështja është sa funksionale do të jenë ato dhe si do të ndikojnë në qarkullimin e automjeteve. Dhe për çudi, në projektet e rikonstruksionit të rrugëve, nuk parashikohen as korsi emergjencash, qofshin për ambulancat apo zjarrfikëset, që në jo pak raste mbeten të bllokuara në trafik.
Sot të udhëtosh brenda qytetit, mund të mbetesh i bllokuar në trafik me orë, veçanërisht në orët e mëngjesit apo pasdrekes. Duket se Veliaj nuk jeton në kryeqytet, ose vijon të shohë ëndrra.
I ftuar në emisionin ‘’Koha për t’u zgjuar’’ në News24, Veliaj tha se trafiku në Tiranë, sidomos në rrugën e Durrësit ishte keq.
“Definicioni i inovacionit është provo diçka tjetër dhe provoje si do jetë. Nga rruga e Durrësit hyjmë, nga Mine Peza dalim.
Legjendë urbane ngushtimi i rrugëve. Një korsi tek Myslym Shyri ishte e zënë nga automjetet. Edhe te Rruga e Durrësit, por tani i është lënë transportit urban.
70% e qytetarëve në Tiranë kanë automjete, 9% kanë biçikleta. Edhe këta të fundit paguajnë taksë.
Edhe këmbësori, edhe çiklisti, edhe ai me urban, edhe ai me makinë duhet të jenë në proporcion.
Detyra e Bashkisë është të sistemojë interesat. Ka dhe shtresa të tjera të popullsisë.
Deri vitin tjetër mbaron dhe mbikalimi i Shqiponjës. Jam në një punë që dëgjoj opinione për rrugët, arkitektura.
Tirana ka më shumë apo më pak vende parkimi? Padyshim që kemi hequr disa te Myslym Shyri, por ka 300 te Skënderbeu. Më parë s’kishte te Bulevardi i Zogu l, stadiumi dhe 7 xhuxhat. Historia e parkimit është sa më shumë bën, aq më shumë kërkohet.
Parimi është sa më shumë rrugë bën, është ftesë që të kalojnë më shumë me automjete”, tha Veliaj.
Me pak fjalë, me punimet e kryera në disa akse, Bashkia e Tiranës e drejtuar nga Veliaj, po eksperimenton, dhe nëse eksperimenti nuk rezulton produktiv, nuk është çudi që pas 1 viti të rinisin punimet.
