Cilësitë kryesore të Messit, si duket loja e tij në sytë e një trajneri!

Lionel Messi ka qenë tema kryesore e bisedave gjatë merkatos së verës. Por pavarësisht dëshirës së tij për tu larguar nga Barcelona, argjentinasi në fund ka zgjedhur të qëndrojë në klubin e fëmijërisë së tij edhe për një sezon tjetër pavarësisht mosmarrëveshjeve të ashpra me bordin drejtues.

Kështu që, me Messin ende një lojtar të Barcelonës, “MARCA” është bashkuar me “MBP School” për t’ju sjellë një analizë të lojës së tij për klubin katalanas.

Cilësitë kryesore të lojës së Messit:

Gjetja e një pasimi direkt

Një nga cilësitë e shumta që Messi zotëron është syri i tij për pasimin e duhur. Gjatë ndeshjeve, ai pëlqen të marrë pozicione më të thella dhe të luajë me topa depërtues për shokët e tij të skuadrës.

Këto pasime lejojnë shokët e tij të skuadrës të  gjenden në pozicione të mira për shënimin e golave, duke e ditur se kapiteni i tyre gjithmonë do t’i gjejë ata në fushën e lojës.

Llogaritja kohore e pasimit

Një mënyrë tjetër në të cilën Messi ndihmon shokët e tij të skuadrës është duke llogaritur kohën e pasimit të tij drejt përsosmërisë.

33-vjeçari është më i rrezikshëm kur ai dhe shoku i tij i skuadrës e gjejnë veten në avantazh ndaj një mbrojtësi.

Në atë situatë, jo vetëm që Messi zgjedh opsionin më të mirë, por ai e lëshon topin në kohën e duhur.

Driblimet

Nr.10 i Barcelonës e di saktësisht se ku dhe kur të driblojë në fushë.

Një nga tiparet e tij kryesore është driblimi me “gjuhën trupore”, e cila e lejon atë të kalojë mbrojtësit e në zonat e rrezikshme dhe të ketë hapësirë për të gjuajtur.

Pra me lëvizjen e trupit të tij ai mashtron mbrojtësin dhe lëviz në drejtimin e kundërt të tij.

“Prekjet pozitive” të topit

Kur Messi merr topin ndaj një mbrojtësi kundërshtar, ai shpesh do të përdorë prekjen e tij të parë ose të dytë për t’i shpëtuar mbulimit të tyre.

Stili direkt i lojës së tij dhe dinamizmi i lëvizjeve të tij mund të shqetësojnë mbrojtjen dhe të hapin pozicione të rrezikshme sulmuese për të dhe shokët e tij.