U hodh sot në Nyon të Zvicrës shorti i “play-off”-it të Ligës së Europës, ku vendi ynë do të përfaqësohet nga Tirana.
Bardheblutë kaluan një tur në Champions, pastaj u eliminuan nga Crvena Zvezda nga ky kompeticion, në fazën e dytë, por kishin të drejtën të vijonin garën në kompeticionin e dytë europian për nga rëndësia, pikërisht Europa League.
Ata ishin me fat, sepse nuk luajtën në turin e radhës, duke u kualifikuar direkt për në “play-off”.
Tashmë Tirana e sheh veten një hap larg fazës së grupeve. Për të arritur këtë stacion historik për ta, 25 herë kampionët e Shqipërisë duhet të kalojnë kundërshtarin e radhës, që e mësuan sot nga goglat e shortit. Fjala është për gjigantët e Zvicrës, Young Boys.
Në fakt, është kundërshtari më i vështirë i mundshëm, nëse nuk e konsiderojmë më lart Dinamo Zagreb, që mund të dilte po ashtu nga goglat.
Young Boys-Tirana do të luhet më 1 tetor.
