Mbrëmjen e djeshme përfundoi faza e tretë e ndeshjeve kualifikuese të Champions League. Kështu Tirana ka mësuar edhe 5 prej 8 kundërshtarëve të mundshëm, që mund të përballet në “Play-Off”-in e Europa League
Dinamo Zagreb, Young Boys, Qarabag, Crvena Zvezda dhe Dinamo Brest, janë 5 skuadrat që nuk mundën të vazhdonin dot aventurën në Champions, teksa pas eliminimit kaluan në “Play-Off”-in e Ligës së Europës.
Padyshim që kampionët e Bjellorusisë, Dinamo Brest, janë rivali më i lehtë në letër për bardheblutë, ndërkohë që edhe një përplasje e dytë me Crvena Zvezdën sërish në shtëpi, do të ishte deri diku e pranueshme.
Mes kandidatëve më të mundshme për të qenë në vazon e rivalëve të Tiranës janë Celtic, Astana e Ludogorets që kanë koeficientet më të larta.
Kujtojmë që shorti do të hidhet nesër, ndërsa ndeshjet e kësaj faze do të luhen të enjten e 1 tetorit me ndeshje teke.
