Sezoni 2020/21 i Premier League nisi zyrtarisht ditën e djeshme me katër sfida teksa ra në sy fitorja 0-3 e Arsenalit në transfertën e Fulham dhe ndeshja spektakolare mes Liverpoolit dhe Leeds e përfunduar 4-3 në favor të skuadrës së Klopp.
Ndërkohë ditën e sotme do të luhen edhe dy ndeshje të tjera teksa e gjithë vëmendje shkon te sfida Tottenham- Everton, aty ku Jose Mourinho do të vihet përballë Carlo Ancelottit.
Një duel i fortë ndërmjet dy skuadrave historike të këtij kompeticioni, gjithsesi “gjelat” e Londrës përveç avantazhit të faktorit fushë kanë gjithashtu edhe një të dhënë tjetër tepër interesante në favor, duke pasur parasysh që me 27 fitoret në historinë e Premier League-s i konsiderojnë blutë nga qyteti i Liverpulit si gjahun e tyre të preferuar.
Drejtuesit e këtyre klubeve janë munduar të ndryshojnë diçka, por jo shumë. Diçka më tepër në këtë aspekt kanë lëvizur krerët e klubit nga Merseyside dhe Carlo Ancelotti ka afruar në gjirin e ekipit mbrojtësin Nkounkou nga Marseille, mesfushorin Allan nga Napoli, mesfushorin tjetër Abdoulaye Doucoure, si dhe kolumbianin James Rodriguez, që veterani italian e ka ndër lojtarët e tij të preferuar.
Në krahun tjetër dihet Daniel Levy konsiderohet si një ndër drejtuesit më dorështrënguar dhe, për hir të së vërtetës, përveç portierit veteran Joe Hart, trajneri Jose Mourinho ka forcuar skuadrën e tij me mesfushorin danez Pierre –Emile Hojbjerg, që erdhi nga Southampton-i si dhe mbrojtësin e djathtë Matt Doherty, një ndër mbrojtësit më rezultativë në Premier League, duke marrë në konsideratë faktin që në dy sezonet e fundit 29-vjeçari irlandez me “ujqërit” e Woverhampton-it ka kontribuar me 15 gola dhe 15 asiste.
Tottenham-Everton luhet në orën 17:30 ndërsa më herët në orën 15:00 luhet një tjetër ndeshje e Premier League ajo mes West Brom dhe Leicester.
