Ministri i Brendshëm, Sandër Lleshaj, u la jashtë kupolës drejtuese të PS-së, duke mos u përzgjedhur nga Edi Rama si një nga drejtuesit politikë në qarqe.
Edhe pse më parë ishte drejtues politik në Lezhë, vendin e tij e zuri Lindita Nikolla, e cila u rikthye si një nga drejtueset e PS në fushatë, pas plot 4 vitesh.
Në kushtet kur të paktën deri më tani, Lleshaj nuk bën pjesë në kupolën e drejtimit të socialistëve, ai i është rikthyer punëve rutinë të prezantimit të strukturave policore, gjë që mund t’a bënte edhe Drejtori i Policisë së Shtetit apo ndonjë nga zëvendësit e tij.
Lleshaj ka shkuar në Dibër ku ka prezantuar strukturën Shqiponja. Ai deklaroi se deri më tani në këtë strukturë në të gjithë vendin janë rekrutuar 500 persona nga 2500 kandidatë, ndërsa theksoi se qeveria nuk i ka ndaluar investimet për sigurinë pavarësisht pandemisë së koronavirusit.
Megjithatë ai u shpreh se Dibra është një qytet me kriminalitet të ulët, duke e shpjeguar këtë me faktin se sipas tij, është një qytet që përdor mendjen dhe jo armën.
“Fakti që nuk ka krime të rënda të bën të ndihesh mirë. Dibra ndihet si vend i mendjes dhe aty ku është mendja nuk është dhuna. Dhe fakti që nuk ka dhunë domethënë se këtu ka mend. Së pari falenderoj qytetarët. Ata kanë mundësuar që edhe institucionet të bëhen pjesë e këtij suksesi.
Ne jemi shumë të fokusuar për të investuar të siguria sepse çdo qindarkë e shpenzuar përkthehet nesër në më shumë kulturë. Ne kemi arritur që krahas shumë të tjerave, të investojmë edhe në polici. Vrasjet në Shqipëri janë përgjysmuar sepse kemi investuar për sigurinë. Ne jemi të ndërgjegjshëm për ta vazhduar këtë punë. Sot jemi në momentet më të mira të historisë tonë. Të gjithë treguesit e kriminalitetit janë në ulje. Kjo nuk do të thotë se do bëjmë pushim tani. Por tani duhet të përmirësojmë parametrat”, tha ai.
Leshaj solli në vëmendje krijimin e strukturës E, si dhe njësive të saj për luftën ndaj krimit ekonomik dhe kibernetik, duke theksuar se tashmë krimet nuk po bëhen vetëm fizikisht, por në rrugë teknologjike.
Ai tha se çdo ditë po kapen persona që mendonin se drejtësia i kishte harruar dhe vazhdonin jetën normalisht pavarësisht se kërkoheshin për krime të ndryshme.
