Policia e Tiranës njoftoi sot arrestimin e një inspektori tatimor, i cili u kap pasi i merrte bizneseve para për të mos i hetuar dhe kallzuar penalisht në prokurori.
Mësohet se inspektori i arrestuar është Erjon Trungu, 37 vjeç, i cili i kishte marrë një biznesmeni shumën prej 5 mijë eurosh.
Por emri i tij nuk është i panjohur, pasi në vitin 2015, Trungu u dhunua nga pronari i një biznesi.
Edhe në atë koh Trungu punonte si inspektor në Tatime. Policia njoftonte atëherë se Trungu u dhunua nga pronari i një biznesi, dhe miku i tij, për shkak se tatimori e kishte kapur duke ushtruar aktivitet pa përdorur kasën fiskale.
Njoftimi për arrestimin e tatimorit
Finalizohet operacioni policor i koduar “Tatimori”.
Operacioni nga Seksioni për Hetimin e Korrupsionit në Drejtorinë Vendore të Policisë Tiranë, nën drejtimin e Prokurorisë së Posaçme Kundër Korrupsionit dhe Krimit të Organizuar Tiranë.
Vihet në pranga 1 shtetas, për veprën penale “Korrupsioni pasiv i personave që ushtrojnë funksione publike”.
Seksioni për Hetimin e Korrupsionit në Drejtorinë Vendore të Policisë Tiranë, nën drejtimin e Prokurorisë së Posaçme Kundër Korrupsionit dhe Krimit të Organizuar Tiranë, finalizoi operacionin policor të koduar “Tatimori”, në kuadër të të cilit u arrestua shtetasi:
-E. T., 37 vjeç, me detyrë inspektor në Drejtorinë e Hetimit Tatimor në Drejtorinë e Përgjithshme e Tatimeve.
Nga hetimet e kryera ka rezultuar se ky shtetas iu kërkonte dhe iu merrte shuma të konsiderueshme monetare subjekteve të ndryshme private, si këmbim për të mos i hetuar dhe mos i referuar në prokurori, kur këto subjekte konstatoheshin në shkelje.
Në cilësinë e provës materiale u sekuestrua shuma monetare prej 5000 eurosh, të cilën ky shtetas ia kishte marrë administratorit të një subjekti privat.
Vijon puna për dokumentimin ligjor të plotë të kësaj veprimtarie kriminale dhe për identifikimin e personave të tjerë të përfshirë në këtë veprimtari korruptive.
Materialet procedurale i kaluan Prokurorisë së Posaçme Kundër Korrupsionit dhe Krimit të Organizuar Tiranë, për veprime të mëtejshme hetimore.
