“Dua 74 mandate”, mësohet të jetë shprehur Kryeministri Edi Rama, gjatë takimit me drejtuesit politikë të qarqeve, të cilët i ka mbledhur në kuadrin e përgatitjeve të strukturave për zgjedhjet e 25 prillit.
Burime nga PS shprehen se Edi Rama ka kërkuar gjithashtu që drejtuesit e qarqeve duhet të hartojnë raporte të detajuara mbi problemet, qofshin këto në nivel partiak, lokal apo qeverisës.
“Prej prej jush raporte të detajuara, me të gjitha problematikat, përfshi këtu institucionet vendore, strukturat partiake dhe qeverisjen në nivel qendror.
Mblidhni informacione lidhur me punën e drejtuesve të institucioneve, kërkesat dhe kritikat e qytetarëve”, mësohet t´i jetë drejtuar Rama, drejtuesve politikë të qarqeve.
Kryeministri, i cili edhe më parë ka deklaruar se synon mandatin e 3-të qeverisës, sot nuk ka nguruar që t´ia shprehë të përzgjedhurve prej tij, numrin e mandateve që duhet të synohen në 25 prill.
“Të konfirmojmë 74 mandate për të vijuar qeverisjen e vendit”, mësohet të jetë shprehur Rama.
Burime nga PS shprehen se brenda 2 javësh, drejtuesit politikë duhet të paraqesin raportet e detajuara për secilin qark, si dhe pritshmëritë lidhur me mbështetjen elektorale.
PS prej disa ditësh ka organizuar forumet lidhur zgjedhjet e 25 prillit. Fillimisht Rama mblodhi grupin parlamentar, më pas drejtuesit e bashkive, ndërsa mbledhja e Asamblesë së PS është shtyrë përtej datës 11 shtator. Duket se Rama po fiton kohë lidhur me ndryshimet e pritshme jo vetëm në forumet drejtuese të PS-së, Kryesinë e kvsaj partie, por edhe Qeveri.
