Dy persona janë arrestuar ditën e sotme në Vlorë pasi akuzohen se kishin kultivuar kanabis në banesën e tyre, ndërkohë që gjatë kontrollit në banë nga policia, iu gjetën dhe 2 kallashnikov.
“Bazuar në informacionet e marra në rrugë operative, Seksioni për Hetimin e Narkotikëve në Drejtorinë Vendore të Policisë Vlorë ka finalizuar operacionin e koduar “Llakatundi”, në kuadër të të cilit, në bashkëpunim me shërbimet e Komisariatit të Policisë Vlorë, u bë kapja dhe arrestimi i shtetasve: H. T., 40 vjeç dhe A. B., 50 vjeç, të dy me banim në fshatin Llakatund, Vlorë.
Si rezultat i këtij operacioni, Policia ka evidentuar dhe asgjësuar fidanë të dyshuar cannabis sativa, të cilat ishin kultivuar në pronën e këtyre shtetasve, në fshatin Llakatund. Po gjatë operacionit, shërbimet e Policisë gjetën dhe sekuestruan edhe 2 armë zjarri kallashnikov me municion luftarak, të cilat dyshohet se i posedonin këta shtetas”, njoftoi policia.
Materialet procedurale i kaluan Prokurorisë së Vlorës, për veprime të mëtejshme hetimore, shtuan të njëjtat burime.
