“Pandemia zbuloi dështimin e rradhës së qeverisë, e cila nuk ka asnjë strategji për nxënësit dhe fëmijët me nevoja të veçanta”. Kështu u shprehën ish-deputetet e PD-së, Albana Vokshi dhe Oriola Pampuri, ndërkohë që viti i ri shkollor nis më 14 shtator.
Dy ish-deputetet demokrate kanë shprehur shqetësimin lidhur me nxënësit me aftësi të kufizuara dhe me probleme shëndetësore kronike në Berat, të cilëve nuk i është dhënë asnjë informacion se si do të rikuperojnë dijet pas mbylljes së shkollave nga Covid – 19.
Vokshi dhe Pampuri u takuan në Berat me prindër të këtyre fëmijëve.
“Qeveria ashtu sikurse veproi për pandeminë, ose tërmetin, nuk ka plan, nuk ka strategji, nuk ka buxhet për të siguruar kushte të nevojshme për të respektuar protokollin e sigurisë, tha Albana Vokshi pas takimit me prindërit e fëmijëve me nevoja të veçanta.
Sipas saj, për këta fëmijë kërkohen më tepër masa shtesë.
“Për këta fëmijë nuk flitet. Këta fëmijë janë inekzistent për këtë qeveri. Nuk ka mësues ndihmës, çfarë do të bëhet me fëmijët që kanë nevojë për këta mësues ndihmës. Qeveria nuk ka marrë asnjë masë për të kontraktuar mësues shtesë. Nuk kanë specialistët e nevojshëm, logopedistët apo specialistë të fushave të tjera që nevojiten për një shëndet më të mirë”, tha Vokshi.
Oriola Pampuri tha se nuk është dhënë asnjë informacion se sa ishte efektiv mësimi online për këta fëmijë me nevoja të veçanta.
“Nuk kemi asnjë strategji se si këta prindër do të çojnë fëmijët e tyre më datë 14 shtator. Ministrja e Arsimit, Ministrja e Shëndetësisë dhe Edi Rama bëjnë vetëm shoë për propagandë”, tha Pampuri.
