Një auditim i Kontrollit të Lartë të Shtetit në Institutin e Gjeoshkencave, Energjisë, Ujit dhe Mjedisit, për periudhën Janar-Dhjetor 2019, ka zbuluar problematika të shumta. Një prej tyre është edhe mungesa e pajisjeve të specializuara, të nevojshme për kryerjen e punës së institucionit.
Në raportin e KLSH-së zbulohet se në tërmetin e Nëntorit, që solli viktima dhe dëme të shumta materiale, u regjistruan vetëm 15 sekondat e para. Kjo pasi u ndërpre energjia elektrike dhe stacionit i mungonte pajisja UPS, që mundëson regjistrimin e të dhënave në të tilla raste.
“Referuar regjistrimeve të vëna në dispozicion nga Departamenti i Sizmologjisë në IGJEUM në lidhje me tërmetin e datës 26.11.2019, i cili ka patur impakt në jetë njerëzish dhe dëme të shumta materiale, konstatohet se mungojnë të dhëna të plota nga stacioni i Durrësit, i cili është stacioni më i afërt me vatrën e tërmetit. Ky stacion ka regjistruar vetëm 15 sekondat e para të tërmetit, si pasojë e ndërprerjes së energjisë elektrike. Nisur nga fakti që gjatë një tërmeti të fortë ekziston një probabilitet i lartë për ndërprerjen e energjisë elektrike, është e domosdoshme pajisja e stacioneve sizmologjike me bateri (UPS) të cilat mundësojnë regjistrimin e të dhënave edhe nëse ndërpritet energjia elektrike. Theksojmë se funksionimi i rregullt i tre rrjeteve sizmike në vendin tonë është i rëndësishme për parashikimin dhe monitorimin e katastrofave natyrore në kohë reale, duke marrë masa në drejtim të mbrojtjes së jetës së njerëzve dhe reduktimin e dëmeve materiale”, thuhet në raportin e KLSH.
Lidhur me problematikën, KLSH rekomandon që IGJEUM në bashkëpunim me UPT (Universiteti Politeknik Tiranë), të marrin masat e nevojshme për analizimin e situatës dhe hartimin e një plan veprimi të ndarë në 3 faza, afat shkurtër, afat mesëm dhe afat gjatë, për kryerjen e ndërhyrjeve në sistemet IT si dhe në ambientet fizike ku këto sisteme janë, me qëllim krijimin e kushteve të përshtatshme për mbledhjen, përpunimin dhe ruajtjen e të dhënave që këto sisteme kanë, në përputhje me standardet dhe praktikat më të mira të fushës.
/BN/
