Rrikthehen radhët në Kapshticë. Kuota e lejimit të kalimit prej 300 personash nga pala greke është plotësuar dhe autoritetet helene në doganë kanë ulur traun, duke mos lejuar kalime të tjera në kufi.
Në një njoftim, stacioni i Policisë Kufitare Kapshticë apelon për qytetarët që të mos shkojnë drejt Kapshticës.
“Njoftojmë të gjithë qytetarët që janë të interesuar të kalojnë në drejtim të shtetit grek, se aktualisht kuota prej 300 shtetas është plotësuar dhe nga ana e policisë greke është pezulluar puna e nuk do të lejohet kalimi i personave të tjerë për ditën e sotme. Policia Kufitare apelon për qytetarët që duan të udhëtojnë në drejtim të Greqisë, që të mos vijojnë udhëtimin në drejtim të PKK Kapshticë për ditën e sotme”, njofton policia.
Ndërkohë, qytetarët në radhë shprehen të shqetësuar duke treguar se sot u skadon afati i konfirmuar onlline për të kaluar, në një kohë kur kuotat ua kanë zënë ata që qëndronin në radhë dje. Problem mbetet dhe afati i tamponit, që duhet të paraqitet në doganë.
