Nga BoldNews.al
Në një kohë kur teknologjia e përcjellë informacionin në kohë reale tek njerëzit, shumë kompani private shpenzojnë para nga portofoli i tyre financiar për të reklamuar aktivitetin në rrjete sociale, nëpërmjet sponsorizimeve.
Një trend të tillë ka ndjekur edhe Fondi Shqiptar për Zhvillimin e Diasporës. Me një ndryshim thelbësor-kompanitë private shpenzojnë nga të ardhurat e tyre.
Ndërsa institucioni nën varësinë e ministrit Pandeli Majko ka shpenzuar paratë publike, nëpërmjet tenderit “Shërbim promovimi digjital”, nëpërmjet rrjeteve sociale ndërkombëtare”.
Procedura e tenderit nuk duket se ka ndonjë problem të dukshëm. Fondi prej 3 milionë lekë (të vjetra) është fituar nga një kompani e re, e themeluar në qershor të këtij viti dhe që duket se, për të hyrë në treg, ka dhënë ofertën më të ulët.
Por, edhe në këtë rast, siç ka ndodhur më parë me tenderat e strukturave në varësi të Majkos, sidomos ai për lojën “Mos u nxeh” (link: https://boldnews.al/2020/07/30/tenderi-i-habitshem-qeveria-zbut-diasporen-u-blen-2000-cope-loje-mos-u-nxeh/) , e çuditshmja qëndron në objektin e procedurës së prokurimit publik.
Fondi Shqiptar për Zhvillimin e Diasporës ka vendosur të kryejë sponsorizime në rrjete sociale, me qëllim që t’u tregojë shqiptarëve në vende të ndryshme të botës se ekziston.
Institucionet publike, si rregull, nuk ka nevojë që të reklamojnë faktin që ekzistojnë. Ekzistenca e tyre provohet me politika zhvillimore, projekte e programe.
Dhe, në fakt, Ministria e Diasporës dhe strukturat e saj të varësisë kanë për të bërë shumë në drejtim të hartimit të politikave serioze për të thithur jo vetëm investime nga shqiptarët e e mërguar prej shumë vitesh, por edhe për t’i nxitur ata që të reklamojnë aspektet pozitive të Shqipërisë.
Por, duket se shqetësimi primar për strukturat qeveritare të Diasporës është të tregojnë që ata ekzistojnë, megjithëse Majko ka rreth 4 vjet që mban detyrën e ministrit.
Ky “shqetësim” dëshmohet edhe nga vetë Fondi për Diasporën, i cili e shpjegon në mënyrë të detajuar nevojën që ka si institucion për të shpenzuar disa para publike për sponsorizime në rrjete sociale (Shërbim promovimi dixhital).
“Fondi Shqiptar për Zhvillimin e Diasporës është duke zhvilluar aktivitetet:
- Krijimi i Rrjetit të Profesionistëve në Diasporë, aktiviteti 2
- Si të fillosh një biznes në Shqipëri, aktiviteti 4
- Digjitalizimi i veprave shqiptare, aktiviteti 5
Këto aktivitete, midis të tjerash, kanë pjesë përbërëse të tyre edhe 3(tre) platforma elektronike, si produkte që mundësojnë komunikimin dhe ndërveprimin me grupet e synuara të projektit, të cilët ndodhen jashtë vendit. Aktualisht platformat janë të publikuara, të pasuruara më informacion dhe operojnë prej disa muajsh.
Me qëllim rritjen e numrit të përfituesve të projektit, përhapjen e informacionit te palët e interesit, si edhe nisur nga mungesa e kontaktit dhe takimet fizike me ta, nevojitet promovimi i platformave në rrjete sociale nëpërmjet fushatave të marketingut digjital.
Për këtë arsye, për të rritur shikueshmërinë e aktiviteteve online që FSHZHD ofron nëpërmjet platformave elektronike, si dhe per te rritur komunikimin me Shqiptaret ne Diaspore, kërkohet zhvillimi dhe menaxhimi i fushatave promovuese, nëpërmjet kanaleve të komunikimit digjital…”, thuhet në dokumentin e Fondit Shqiptar për zhvillimin e Diasporës .
