Tenderi i habitshëm/ Qeveria “zbut” Diasporën, u blen 2000 copë lojë “Mos u nxeh”

Nga Boldnews.al

Kur Edi Rama vendosi të krijonte Ministrinë e Diasporës, në Shtator 2017, shumëkush që ndjek jetën politike e konsideroi si një veprim të kryeministrit për t’i gjetur Pandeli Majkos një punë si ministër.

Dhe, në fakt, në 4 vite e mandatit të dytë të “Rilindjes”, Ministria e Diasporës ka shërbyer, kryesisht si një mjet për të mbajtur socialistin e orëve të para, Majkon, në kabinetin qeveritar.

Aktiviteti i kësaj ministrie është fare minimal, ndërsa efektet janë thuajse zero. Diaspora, megjithë dëshirën e mirë për të kontribuuar në jetën social-ekonomike të Shqipërisë, ndihet e përjashtuar nga aktivitetet dhe angazhimi në vendin tonë.

E, me të drejtë, shumë eksponentë të Diasporës, kanë shprehur publikisht pakënaqësinë e tyre për qasjen që tregon qeveria “Rama” ndaj kërkesave për kontribut të shqiptarëve që jetojnë e punojnë jashtë vendit.

Për të zbutur mërzinë e Diasporës, Qendra e Botimeve për Diasporën, një strukturë në varësi të ministrit Majko, ka gjetur një zgjidhje sa origjinale, aq edhe për të qeshur.

“Boldnews.al” raporton se Qendra e Botimeve për Diasporën ka vendosur të qetësojë Diasporën, duke porositur plot 2000 copë lojë “Mos u Nxeh”.

Për këdo që është spektik dhe kjo gjetje mund t’i duket shaka pa kripë, mjafton të bëj një kërcim në faqen zyrtare të Agjencisë së Prokurimit Publik (APP).

Pak ditë më parë, Qendra e Botimeve për Diasporën ka shpallur “Ftesën për ofertë”, me objekt “Shumëfishimin e lojës “Mos u nxeh” për 4 qytete,  me  nga 500 kopje për çdo qytet”.

LEXO EDHE  Propozimi/ AAK: Haradinaj të jetë Presidenti i ri i Kosovës

Kushdo që kërkon arsye se përse i duhen Qendrës për Diasporën kopje të lojës “Mos u nxeh”, do të hutohej akoma edhe më shumë, kur të mësonte se shpërndarja e kësaj loje do të bëhet në qytetet Tiranë, Shkodrë, Korçë e Gjirokastër.

Është e paqartë se cili grupim shoqëror cilësohet “Diasporë” në këto qytete, por gjithësesi, duket se Qendra e Botimeve për Diasporën e ka marrë seriozisht realizimin e një tenderi të tillë.

“Ftesa për ofertë” pritet t’i shërbejë strukturës në varësi të Majkos për të përcaktuar fondin limit të tenderit.

Ofertuesit, pra kompanitë private, duhet të plotësojnë disa kushte tejet rigoroze dhe serioze, nëse do të duan që produkti i tyre të jetë fitues në tenderin e pritshëm.

Operatori ekonomik ofertues, i cili do të realizojë prodhimin ose furnizimin me lojëra ‘Mos u Nxeh” duhet domosdoshmërisht të zotërojë certifikatën e cilësisë ISO 9001:2015. Në të kundër, skualifikohet.

Gjithashtu, operatori ekonomik duket të provojë se ka kontrata të ngjashme me subjekte privatë ose publike. Pra, ofertuesit duhet të tregojnë se u kanë shitur lojë “Mos u nxeh” ose të ngjashme, edhe institucioneve të tjera shtetërore.

Pak e vështirë për t’u plotësuar si kusht, por gjithësesi ndoshta mund të ketë shoqëri private që u kanë shitur lojëra të tilla institucioneve parashkollore publike ose qendrave rezidenciale për të moshuarit.