Nga BoldNews.al
Këshilli i Emërimeve në Drejtësi do të mblidhet në 21 Gusht për të vendosur nëse do të lejojë ose jo kandidatin Shaqir Hasanaj të vijojë garën për në Gjykatën Kushtetuese, duke nxjerrë në pah një spirale absurde vendimesh me standarte të ndryshme dhe që kundërshtojnë njëra-tjetrën në procedurat për përzgjedhjen e zyrtarëve të strukturave më të larta të drejtësisë.
Këshilli i Emërimeve në Drejtësi, me vendimin nr. 15, dt. 17 Korrik 2020, vendosi ndalimin e Shaqir Hasanaj për të kandiduar për një post vakant në Gjykatën Kushtetuese.
Për KED, fakti që Hasanaj ka mbajtur detyrën e Këshilltarit të Presidentit të Republikës deri në vitin 2017 e përfshin atë në kushtet e parashikimit ligjor që ndalon emërimin e personave që kanë mbajtur “poste politike” në 10 vitet e fundit.
Por, KED, në Korrik 2019 vendosi të kualifikojë kandidaturën e Artur Metanit për Inspektor të Lartë të Drejtësisë, duke argumentuar tërësisht të kundërtën, atë që këshilltari i Presidenti nuk përbënte “funksion politik”.
Megjithatë, jurisi Shaqir Hasanaj nuk ka dalë ende “jashtë loje”.
Gjykata Administrative e Apelit, e investuar me një padi prej tij, rrëzoi vendimin e Këshillit të Emërimeve në Drejtësi.
Vendimi i Gjykatës ende nuk është bërë publik. Madje, deri në publikimin e këtij shkrimi, vendimi i zbardhur nuk i ishte vënë në dispozicion as anëtarëve të Këshillit të Emërimeve në Drejtësi, përveç relatores Saida Dollani.
Edhe pa një vendim gjyqësor të zbardhur, kuptohet qartësisht se trupa e Gjykatës Administrative e Apelit, me relatore Alkelina Gazidedja, nuk e ka konsideruar pozicionin e këshilltarit të Presidentit si “funksion politik”.
Kjo përplasje argumentash juridikë zbulon hapur standarte të shumëfishta që aplikon Këshilli i Emërimeve në Drejtësi për verifikimin e kandidaturave.
Rasti më konkret dhe më flagrant për të identifikuar standarte të ndryshme të KED është përballja e vendimeve për Artur Metanin, kandidat dhe tashmë Inspektor i Lartë i Drejtësisë dhe Shaqir Hasanaj, kandidat për në Gjykatën Kushtetuese.
Standartet
Artur Metani dhe Shaqir Hasanaj kanë qenë të dy këshilltarë të Presidentit të Republikës në 10 vitet e fundit.
Të dy u përballën me Këshillin e Emërimeve në Drejtësi-Metani si kandidaturë për Inspektor të Lartë të Drejtësisë dhe Hasanaj si kandidat për Gjykatën Kushtetuese.
Pavarësisht se aplikuan për pozicione të ndryshme, ata duhet të plotësonin të njëjtat kushte dhe kritere ligjore për t’u lejuar për kandidim.
Por, megjithëse të dy juristët ishin në të njëjtat kushte, KED, në mënyrë absurde, vendosi që Metanin ta lejojë, ndërsa Hasanajn ta ndalojë.
“Boldnews.al” ka analizuar më parë se KED nuk mund dhe nuk duhet të lejonte kandidimin e Artur Metanit për postin e Inspektorit të Lartë të Drejtësisë, pasi ai kishte mbajtur “funksionin politik” të Këshilltarit të Presidentit deri në vitin 2012 (brenda 10 viteve të fundit).
Por, KED, me vendimin nr. 100, dt. 30.07.2019 vendosi lejimin e kandidatit Artur Metani për të vijuar garën për Inspektor të Lartë të Drejtësisë.
Ky vendim, i cili vinte ndesh me parashikimet ligjore, u komentua si “i nxitur politikisht”, pasi Metani, në atë moment, ishte në detyrën e Avokat i Shtetit, i emëruar nga kryeministri Edi Rama, si edhe është vëllai i deputetes së maxhorancës, Eglantina Gjermeni.
Në vendimin e lejimit për Metanin, KED argumentonte se “Këshilli konkludon se funksioni i këshilltarit juridik të Presidentit të Republikës nuk mund të konsiderohet si funksion politik, në kuptim të ligjit 115/2016” dhe se ai “…nuk është në kushtet e ndalimit të kandidimit…”.
I njëjti institucion, pra KED, për situatë identike, vendosi t’i japë një interpretim tërësisht të ndryshëm kandidaturës së Shaqir Hasanajt.
Në vendimin nr. 15, dt. 17.07.2020, KED shkruan: “Këshilli konstaton se kandidati Shaqir Hasanaj ka qenë Këshilltar juridik i Presidentit të Republikës…ndaj ai nuk plotëson kushtin për lejimin e kandidimit…”.
Këshilli i Emërimeve në Drejtësi, me ndalimin e kandidaturës së Shaqir Hasanajt, duket se ka synuar të korrigjojë “gabimin” me procedurat e ndjekura për Artur Metanin, i cili në Dhjetor 2019 mori pëlqimin e socialistëve në Parlament për të drejtuar Inspektoratin e Lartë të Drejtësisë për një mandat 9-vjeçar.
Por, “korrigjimi” i KED u hodh poshtë nga Gjykata Administrative e Apelit, e cila rrëzoi vendimin për ndalimin e kandidimit të juristit Shaqir Hasanaj për në Gjykatën Kushtetuese.
Ende nuk janë të qartë argumentat e gjykatës në këtë vendimmarrje, por, me shumë mundësi, ajo do të jetë bazuar pikërisht tek vendimi kontravers i Këshillit të Emërimeve në Drejtësi për rastin e Artur Metanit.
Tashmë, situata rikthehet sërish në KED, i cili duhet të vendosë edhe njëherë tjetër për juristin Shaqir Hasanaj.
