Barcelona mbylli mbrëmjen e djeshme një sezon krejtësisht të dështuar. Pasi u eliminua nga Kupa e Mbretit dhe dështoi në La Liga kundër Real Madrid, humbja e thellë 8-2 ndaj Bayern Munich në Champions League duket se do të sjellë ndryshime të pashmangshme në klubin spanjoll.
I pari që pritet ta pësojë është trajneri Kike Setien edhe pse problemet e Barcelonës shtrihet përtej atij që drejton skuadrat duke marrë parasysh këtu dështimet e njëpasnjëshme të skuadrës në Europë.
Gjithsesi drejtuesit e Barcelonës janë duke menduar trajnerin e ardhshëm të skuadrës dhe kanë nisur telefonatat.
Dëshirat dhe emrat janë të shumtë, por tani do të marrin pak kohë për të bërë zgjedhjen e duhur dhe për të mos gabuar sërish si me Kike Setienin.
Xavi Hernandez është një prej emrave që iu pëlqen drejtuesve, të cilin tentuan ta merrnin në janar kur shkarkuan Valverden. Ai refuzoi, sepse tha se nuk ishte momenti i duhur, por nuk dihet nëse tani do të pranojë për të rindërtuar skuadrën nga e para.
Një tjetër trajner është Masimiliano Alegri, i cili prej një viti është i papunë. Zgjidhi kontratën me Juventusin një sezon më parë dhe tani ka karikuar bateritë për të nisur një tjetër aventurë.
