Gjashtë makina dhe një automjet i rëndë u përfshinë në një aksident që ndodhi pak para orës 11:00 në kilometrin 34 të autostradës A12 Genova-Sestri Levante.
Si pasojë e aksidentit mbetën të plagosur disa persona, raporton Ansa. Mes të plagosurve janë edhe dy fëmijë. Të dy u dërguan në spitalin Gaslini në Xhenova, një me helikopter dhe tjetri me ambulancë.
Vajza 2-vjeçare e dëmtuar në aksident dhe e transportuar me ambulancën ajrore në spitalin pediatrik Gaslini nuk është rëndë. Vajza e vogël mbërriti në dhomën e urgjencës me kod të verdhë. Kjo u njoftua nga menaxherët shëndetësorë të spitalit.
Vogëlushja, një shqiptare që jeton në Lombardi, është në kushte klinike të qëndrueshme.
Ajo nuk ka pasur lëndime trurit dhe barku, vetëm disa plagë në kokë u qepën. Mjekët e kanë vendosur atë nën vëzhgim për orët e ardhshme .
Pas aksidentit, një pjesë e autostradës A12 Genova-Sestri Levante midis Chiavari dhe Rapallo, në drejtim të Xhenovas, u mbyll përkohësisht dhe më pas u rihap.
Guvernatori i Liguria Giovanni Toti, ka reaguar në rrjetet sociale, ku shprehet se edhe sot ligurianët janë bllokuar në autostradë mes punimeve, që në vend që ta bëjnë rrugën më të sigurt, vazhdojnë të krijojnë aksidente.
