Pjesa më e madhe e Ekspertëve të Nivelit të Lartë të Reformës në Drejtësi tashmë janë titullarë të institucioneve të reja, pavarësisht se fillimisht u deklarua që ata nuk do të lejoheshin të kandidonin, për të shmangur konfliktin e interesave.
Draftet fillestare, të cilat ndalonin në mënyrë eksplicite kandidimin e Ekspertëve të Lartë në “drejtësinë e re” u ndryshuan me disa modifikime të “minutës së fundit”, të sugjeruara nga Kryetari i Komisionit të Posaçëm të Reformës në Drejtësi, Fatmir Xhafaj.
Diku u hoq një nen, diku një paragraf apo shprehje në projekt-ligje dhe Ekspertët e Nivelit të Lartë i panë dyert e hapura për të qenë, jo vetëm pjesë e strukturave të reja të drejtë, por edhe në poste titullarësh.
“Boldnews.al” ka bërë një përmbledhje mbi pozicionet që kanë aktualisht ata që u konsideruan si “Ekspertë të Nivelit të Lartë”, përfshirë Sokol Sadushi, Gent Ibrahimi, Artan Hoxha, Arben Rakipi dhe Ilir Panda.
Emrat
Në 2 Prill 2015, Komisioni i Posaçëm Parlamentar për Reformën në Drejtësi, i drejtuar nga Fatmir Xhafaj, një ish-hetues i komunizmit, i katapultuar si politikan i dorës së parë në Partinë Socialiste, miratoi listën e Ekspertëve të Nivelit të Lartë, të ndarë në disa grupe pune.
Sokol Sadushi
- Grupi për Amendimet Kushtetuese dhe Gjykatën Kushtetuese drejtohej nga Sokol Sadushi, në atë kohë Drejtor i Shkollës së Magjistraturës dhe Rainer Deville, shef i Misionit të Euralius IV, i cili u largua nga Shqipëria pas një serie skandalesh, që lidheshin kryesisht me Reformën në Drejtësi.
Sokol Sadushi tashmë është kryetar në detyrë i Gjykatës së Lartë, i përzgjedhur nga Këshilli i Lartë Gjyqësor, pas një procesi të dyshimtë Vetingu
Gent Ibrahimi
- Grupi për Reformën në Sistemin Gjyqësor drejtohej nga Gent Ibrahimi, në atë kohë ekspert në Komisionin Këshillimor të Reformës Ligjore pranë Ministrisë së Drejtësisë) dhe Agnes Bernhard, Zv/shefe e Misionit EURALIUS IV, financuar nga Bashkimi Europian.
Gent Ibrahimi është aktualisht kryetar i Këshillit të Lartë të Prokurorisë. Ibrahimi u zgjodh në këtë detyrë, pavarësisht se Operacioni Ndërkombëtar i Monitorimit (ONM) konstatoi se ai nuk plotësonte kërkesat formale ligjore për t’u emëruar në “qeverinë e prokurorëve”.
Artan Hoxha
- Grupi për Reformën në Drejtësinë Penale drejtohej nga Artan Hoxha, pedagog në Fakultetin e Drejtësisë, si edhe Jon Smibert, Këshilltar ligjor i OPDAT, mision i Shteteve të Bashkuara të Amerikës
Artan Hoxha u zgjodh së fundmi Rektor i Universitetit të Tiranës, në një proces pa garë dhe të kontestuar shumë nga pedagogë dhe studentë, për shkak të kohës së zgjedhur për të kryer procesin elektoral në arsimin e lartë.
Ilir Panda
- Grupi për Financimin e Sistemit të Drejtësisë drejtohej nga Ilir Panda, në atë kohë (Ekspert në Komisionin Këshillimor të Reformës Ligjore pranë Ministrisë së Drejtësisë, dhe Agnes Bernhard, Zv/shefe e Misionit EURALIUS IV, BE.
Ilir Panda, prej Marsit 2020, është emëruar anëtar i Gjykatës së Lartë
Arben Rakipi
- Ish-Prokurori i Përgjithshëm, Arben Rakipi, ishte Ekspert i Nivelit të Lartë në Grupin e Punës për Drejtësinë Penale. Ai vinte nga radhët e pedagogëve të Shkollës së Magjistraturës.
Pak ditë më parë, në 28 Korrik 2020, Arben Rakipi u emërua Drejtor i Shkollës së Magjistraturës, ndërkohë që në media është aluduar se pozicioni i tij është në konflikt interesi me aktivitetin privat si drejtues i dy zyrave avokatore.
