Drejtuesit e spitalit “Shefqet Ndroqi”, i kthyer tashmë në një spital “Covid2” kanë replikuar në distancë me Partinë Demokratike, lidhur me numrin e personave të shtruar në këtë spital.
PD publikoi mesazhin e një prej mjekëve të Covid2, sipas të cilit Ministria e Shëndetësisë në përditësimin e të dhënave gënjen lidhur me numrin e qytetarëve të shtruar në spitalet Covid, veçanërisht te “Shefqet Ndroqi”.
Gjithashtu PD denoncoi edhe mungesën e medikamenteve anti-virale në këtë spital.
“Në përgjigje të reagimit të Partisë Demokratike, Spitali Universitar “Shefqet Ndroqi” informon qytetarët se nuk mungon asnjë medikament apo trajtim për pacientët e shtruar që përdoret në protokollet e përcaktuara të mjekimit në spitalin tonë.
Spitali Covid 2 “Shefqet Ndroqi” ka marrë të gjitha masat e nevojshme për t’u kujdesur për të gjithë pacientët, me terapitë e plota të mjekimit. Në të njëjtën kohë ftojmë politikanët të na lejojnë të bëjmë punën tonë për t’u shërbyer pacientëve të prekur nga Covid19 ditë e natë, pa ndërprerje, me përkushtim dhe profesionalizëm”, thuhet në njoftimin e spitalit.
Ndërkohë që ende nuk jepet një shifër zyrtare lidhur me rastet e pacientëve që trajtohen në Covid 2, dhe as sa prej tyre janë konfirmuar pozitiv.
Vetë mjekët e Sanatoriumit ankohen se spitali është tejmbushur dhe shifrat janë ndryshe nga ato që deklaron qeveria. Madje shkohet edhe më tej kur ka pacientë që po trajtohen për Covid, edhe pse testet rezultojnë negative. Kjo për faktin se virusi ka zbritur në mushkëri dhe nuk mund të diagnostikohet me tamponë.
Duket se reagimi i drejtuesve të spitalit ose ka qenë i detyruar nga Ministria e Shëndetësisë, ose ato nën shembullin e drejtuesve politikë, kanë marrë një rol përtej misionit të tyre, të bluzave të bardha.
